2018 yil 4 may kuni Toshkent, Buxoro va Xorazm viloyatlarida To‘y-hashamlar, oilaviy tantanalar, ma'raka va marosimlar, marhumlarning xotirasiga bag‘ishlangan tadbirlar o‘tkazilishini tartibga solish yuzasidan o‘tkazilgan jamoatchilik fikrini o‘rganish bo‘yicha Respublika ishchi guruhining yig‘ilishlari bo‘lib o‘tdi. Bu haqda O‘zbekiston Respublikasi Oliy Majlisi Senatining axborot xizmati xabar bermoqda.
Tadbirlarda O‘zbekiston Respublikasi Oliy Majlisi Senatining Fan, ta'lim va sog‘liqni saqlash masalalari qo‘mitasi raisi Z.Nizamxodjayev, mazkur qo‘mita raisining o‘rinbosari G.Alimova va viloyatlar hokimlari o‘rinbosarlari, madaniyat, ichki ishlar, adliya, xalq ta'limi, sog‘liqni saqlash boshqarmalari, Xotin-qizlar qo‘mitasi, Yoshlar ittifoqi, “Nuroniy”, “Mahalla” jamg‘armalari, Savdo-sanoat palatasi Ma'naviyat va ma'rifat markazining viloyatlar bo‘limlari mutasaddilari hamda ommaviy axborot vositalari vakillari ishtirok etdilar.
Yig‘ilishlarda O‘zbekiston Respublikasi Oliy Majlisi Senatining o‘n to‘rtinchi yalpi majlisida qabul qilingan “To‘y-hashamlar, oilaviy tantanalar, ma'raka va marosimlar, marhumlarning xotirasiga bag‘ishlangan tadbirlar o‘tkazilishini tartibga solish masalalari haqida”gi Qarorning ijrosi tahlil qilindi.
Shuningdek, mazkur masala bo‘yicha fuqarolardan kelib tushayotgan taklif va tavsiyalar hamda keng jamoatchilik fikri asosida ishlab chiqilgan Nizom loyihasi muhokama etildi.
Muhokamalar davomida guzarlarda aholiga qulay to‘yxonalar qurish, kafe va restoranlar, san'atkorlar tomonidan ko‘rsatiladigan xizmat haqini, oilaviy tadbirlar, ayniqsa, osh berish tadbirlari o‘tkazilish vaqtini tartibga solish, mehmonlar sonini aniqlash masalalarini, shuningdek to‘y bilan bog‘liq turli xil tadbirlar o‘tkazish, asl an'analarimiz va qadriyatlarimizga zid bo‘lgan bema'ni-bachkana odatlarga yo‘l qo‘ymaslik kabi masalalar ishtirokchilar diqqat markazida bo‘ldi.
Mahalla faollari tomonidan jamiyatda qabul qilingan odob-axloq qoidalariga qat'iy amal qilish zarurligi, milliy urf-odat va an'analarni mensimaslik, shuhratparastlik, dabdababozlik, isrofgarchilik holatlariga, mahallalarda ijtimoiy-ma'naviy muhit barqarorligiga putur yetkazilishiga yo‘l qo‘ymaslik va bu borada ta'sirchan jamoatchilik nazoratini tizimli olib borish zarurligi qayd etildi.
Yig‘ilishlarda bildirilgan takliflar Ishchi guruhi tomonidan viloyat aholisining, kerak bo‘lsa, har bir xonadon egasining fikrini olish naqadar muhim ekanligini ko‘rsatdi.
Shu bois yig‘ilishlarda keng jamoatchilik fikrini o‘rganish, tuman va mahallalarda istiqomat qilayotgan har bir bir fuqaroning fikrini, taklif va tavsiyalarini olish maqsadida viloyat va tuman miqyosidagi ishchi guruhlarini tashkil etishga qaror qilindi. Ishchi guruhlari zimmasiga tegishli tashkilot vakillarini hamda mahalla faollarini, nuroniylarni, yoshlarni hamda to‘yxona egalarini jalb qilgan holda aholining fikr-mulohazalarini yanada chuqur o‘rganish va takliflarni muhokama qilish, shuningdek mazkur masalaning televideniye, radio, hududiy bosma nashrlar orqali yoritilishini ta'minlash vazifasi yuklatildi.
Bunday tadbirlar Respublika ishchi guruhi a'zolari biriktirilgan har bir viloyatda o‘tkazilmoqda. Xususan, shunday tadbirlardan navbatdagisi 5 may kuni Qashqadaryo viloyatida o‘tkaziladi.
Eslatib o‘tamiz, avvalroq Senat to‘ylar bo‘yicha jamoatchilik fikrini o‘rgangani xabar berilgandi.
