“Ўзагрокимёҳимоя” ишларни кучайтирмоқда: ўсимликларни касалликлардан ҳимоя қилиш янада оширилади

Маълумки, бугунги кунда серқуёш Ўзбекистон заминида етиштирилган маҳсулотлар нафақат ички, балки ташқи бозорларда ҳам жуда харидоргирдир. Бунга уларнинг табиийлиги, турли касалликлардан холи экани ҳам таъсир кўрсатмоқда. Исталган истеъмолчи фақат энг сифатли маҳсулотларни харид қилишни хоҳлайди. Бунда эса шу маҳсулотнинг етиштирилиш жараёни ҳам муҳим ўрин тутади.

“Ўзагрокимёҳимоя” АЖ бошқарувида “Қишлоқ хўжалиги маҳсулотлари етиштиришда илғор тажрибаларни қўллаш ҳамда кўрсатилаётган сервис хизматлар тури ва ҳажмини кўпайтириш бўйича ҳамкорликда амалга ошириладиган чора-тадбирлар” мавзусида ўтказилган семинар ҳам бевосита юқоридаги масалаларни ўз ичига қамраб олди.

Яъни, семинар давлат корхоналари ва тадбиркорлар ўртасида манфаатли ҳамкорликни йўлга қўйиш, ўсимликларнинг зараркунандалари, касалликлари ҳамда бегона ўтларга қарши кураш, ўсимликларни баргидан озиқлантириш (суспензия) тадбирларида илғор чет эл давлатлари тажрибаларини тадбиқ қилиш, томорқа ер эгалари, мева-сабзавот, полиз маҳсулотлари етиштирувчи фермер ва деҳқон хўжаликларига малакали мутахассислар томонидан консалтинг ва агрокимёвий хизматлар кўрсатишни кенгайтириш, сифатли, инсон соғлиги учун зарарсиз ва экспортбоп қишлоқ хўжалиги маҳсулотлари етиштириш учун барча имкониятлардан фойдаланиш каби мақсадларга эга бўлди.

Семинар якунида “Ўзагрокимёҳимоя” акциядорлик жамияти ҳамда кимёвий воситалар ишлаб чиқарувчи ва етказиб берувчи ташкилотлар ўртасида “Ҳамкорлик тўғрисида меморандум” имзоланди.

Шуни алоҳида таъкидлаб ўтиш лозимки, бугунги кунда Қорақалпоғистон Республикаси ва вилоят “Агрокимёҳимоя“ акциядорлик жамиятлари томонидан нафақат ғалла ва пахта майдонларига агрокимёвий хизматлар кўрсатиш, балки қишлоқ хўжалиги маҳсулотларини етиштирувчи фермер, деҳқон хўжаликлари ҳамда шахсий томорқа ер эгаларига ҳам хизмат кўрсатишни ташкиллаштириш ишлари олиб борилмоқда. Жойларда “Аъло хизмат“ деб номланган сервис отрядлари тизими босқичма-босқичйўлга қўйилмоқда.

Бугунги кунда республика бўйича 152 та сервис отрядлари ташкил этилиб, фаолияти йўлга қўйилди.

“Ўзагрокимёҳимоя” қишлоқ хўжалиги маҳсулотларига касаллик тушишининг олдини олиш, профилактика қилишни мақсад қилган. Профилактикага катта эътибор қаратилса, у арзон бўлади, сабаби касаллик тушгандан кейинги харажатларни қисқартириш имконини беради. Бунда қишлоқ хўжалиги маҳсулотига биринчи ўринда сифат жиҳатидан эътибор қаратилади. Шунингдек, у ўз муддатида истеъмолчиларга етказиб берилиши, ҳосили яхши бўлиши ҳам муҳим ўрин тутади.

Қайд этилишича, айнан шу нарса президент топшириғида ҳам кўрсатиб ўтилган. Энди корхона ҳудудларда ҳам давлат-хусусий шерикчилик тамойили асосида пунктлар ташкил қилади. Ният - қишлоқларнинг ичларигача кириб бориш, бунга тадбиркорларни жалб қилиб, пунктлар жорий қилиш йўли билан эришилмоқчи.

Реклама ҳуқуқи асосида