Давит Модзманашвили ярим финалга чиқди, аёллар курашида бронза учун имконият бор

Бугун, 20 август санасида Индонезиянинг Жакарта ва Палембанг шаҳарларида XVIII ёзги Осиё ўйинлари давом эттирилмоқда.

Бугун эркин кураш бўйича аёллар жамоасининг 3 вакили, эркаклар жамоасининг бир вакили баҳсларга қўшилди.

125 кг вазн тоифасида иштирок этувчи Давит Модзманашвили нимчорак финалда индонезиялик Димас Септо Анугҳарага қарши гиламга чиқиб, биринчи раунддаёқ ҳисобни 10:0 кўринишига келтирди ва соф ғалабага эришиб, кейинги босқичга чиқди.

У чорак финалда мўғулистонлик Натсагсурен Золбоо устидан 3:0 (1:0, 2:0) ҳисобида ғалаба қозонди ва ярим финалга йўл олди.

Энди у финал йўлланмаси учун эронлик Парвиз Ҳадизодага қарши баҳс юритади.

Аёллар курашида эса 50 кг вазн тоифасида иштирок этувчи Даулетбике Яхшимуратова нимчорак финал баҳсида вьетнамлик рақибаси Нгуэн Ти Хуан устидан 12:2 (0:2, 12:0) ҳисобида ғалаба қозонди.

Унга чорак финалда мўғулистонлик Эрденсук Нарангерел рақиб бўлди. Ўта қийин кечган баҳс давомида очколар бўйича ортда борган (1:0, 4:6) Ўзбекистон вакили баҳс охирида рақибининг курагини ерга теккизиб, соф ғалабага эришди.

Аммо ярим финал унинг учун омадсиз кечди. Ҳиндистонлик Винеш Винешга қарши курашган Яхшимуратова 0:10 ҳисобида ютқазди. У энди бронза учун курашади.

Ўзбекистоннинг 53 кг вазн тоифасидаги вакили Севара Ешмуратова нимчорак финалда япониялик Окуна Харунага 0:10 ҳисобида (0:8, 0:2) мағлуб бўлди. Агар Харуна финалга қадар етиб борса, Ешмуратовада бронза медал учун курашиш имкони пайдо бўлади.

57 кг вазн тоифасидаги Набира Есенбаева илк жангида индонезиялик Аюнингтиас Мутиарани муддатидан олдин 7:0 ҳисобида мағлубиятга учратди.

Лекин у чорак финалда ҳиндистонлик Данда Пужага ютқазиб қўйди - 1:12 (0:4, 1:8). Ҳинд спортчиси ярим финалда шимолий кореялик спортчига ютқазди ва Есенбаева турнирдаги иштирокини якунлади - унда бронза медали учун курашиш имконияти қолмади.