АҚШнинг Даллас шаҳрида яшовчи Жонатан Колниак ўзининг собиқ иш берувчиси Жеймс Баленгидан у билан базм вақтида салфеткада тузилган шартнома эвазига миллион доллар ундира олди.
Шартномага кўра, Баленги Колниакга хизмат ҳақи сифатида нефть етказиб бериш билан шуғулланувчи компаниясининг 2 фоиз акциясини бериши керак бўлган. Бу миқдордаги акциялар қиймати ўшанда 9 млн долларни ташкил қилган.
Баленги ва Колниак битимни 2015 йилда тузишган. Салфеткада компания номи кўрсатилмаган, бироқ унда 2 фоиз акция ҳақида ва Колниакнинг ойлик маоши 100 минг доллар эканлиги кўрсатилган. Бундан ташқари, битим остида Баленгининг имзоси бўлган. Колниак адвокатининг айтишича, Колниак битимга кўра компанияни сотувга тайёрлашда ёрдам бериши керак бўлган.
Колниак битимнинг ўзига тегишли қисмини бажарган ва компания 2015 йилдаёқ 820 млн долларга сотилган. Шундан кейин Колниакга ваъда қилинган акциялар қиймати 9,35 млн долларгача ошган. Кейинроқ у иш берувчиси билан 2 млн доллар олишга келишиб олган. Бироқ Колниак ишини тугатгунча бу қийматдан бор-йўғи 400 минг долларини олган.
Баленги ва компания ҳеч қандай шартнома бўлмаганини ва улар ҳеч нарса тўлашлари керакмаслигини таъкидлагач, Колниак 2017 йилда судга мурожаат қилган.
Баленги ҳимояси салфеткада имзоланган келишув “тўлиқ ва бемақсад” бўлганини ва у мастлик оқибатида имзоланганини таъкидлаган. Бундан ташқари, ҳимоянинг фикрича, шартномада компания номи келтирилмаган ва бу Колниак бошқа компаниянинг 2 фоиз акциясини талаб қилаётган бўлиши мумкинлигини англатган. Бироқ суд Колниакга ён босиб, унинг талабини қондирган.
