БААда британиялик аспирант афв этилди. Беш кун олдин у жосуслик учун умрбод қамалганди

Бирлашган Араб Амирликлари ҳукумати Буюк Британиянинг Дарем университети аспиранти, жосуслик учун умрбод озодликдан маҳрум этилган Мэтью Хежесни афв этди. Бу ҳақда BBC хабар қилмоқда.

Бирлашган Араб Амирликларидан таъкидлашларича, афв этиш ҳақидаги қарор БАА Миллий куни - 2 декабрь куни нишонланадиган, Амирликлар бирлашган кун муносабати билан чиқарилди.

БААда аспирант «араб баҳори» пайтида ва ундан кейин махсус хизматларнинг ҳаракатлари бўйича илмий изланишлар олиб борган. Ҳукумат фикрича, бу Британия разведкаси учун махфий маълумотларни тўплаш учун ўзига хос ниқоб бўлган.

Хэжес 2018 йил май ойида Дубайда ҳибсга олинган. Қариндошларининг маълум қилишича, уни араб тилидаги ҳужжатларни имзолашга мажбур қилишган. 21 ноябрь куни британиялик жосуслик учун умрбод озодликдан маҳрум этилди. Унинг иши юзасидан суд беш дақиқа давом этган.