Япониянинг Honda компанияси Japan Mobility Show Bizweek кўргазмасида ҳаракатланаётган электромобилни симсиз қувватлаш тизими макетини тақдим этади. Тадбир 13–16 октябрь кунлари Makuhari Messe кўргазма марказида бўлиб ўтади.
Тизимда йўл қопламасига ўрнатилган узаткичлар энергияни ҳаракатланаётган автомобилдаги қабул қилгичга узатади. Ушбу технологияни Honda R&D компанияси Taisei қурилиш компанияси ва Taisei Rotec йўл қурилиши компанияси билан ҳамкорликда ишлаб чиққан: Honda узаткичлар ва қабул қилгичга, Taisei юқори тезликдаги ўзгармас ток манбаига, Taisei Rotec эса ускуналарни йўл қопламасига жойлаштириш усулларига масъул ҳисобланади.
Honda баёнотига кўра, унинг йўл модуллари инвертор ва ғалтакни битта корпусда бирлаштирган илк ишланмадир. Бу бутловчи қисмлар сонини ҳамда йўл ишлари ҳажмини қисқартириб, модулларни амалдаги йўлларга ҳам ўрнатиш имконини беради. Синов трассасида модуллар ва қоплама тахминан 20 тонналик транспорт воситалари келтириб чиқарган юкламани кўтара олди. 2026 йил охиридан бошлаб қурилиши режалаштирилган Тамурадаги иккинчи полигонда эса ғилдиракларнинг миллион марта босиб ўтиши ҳамда электромагнит майдон сизиб чиқиши синовдан ўтказилади.
Умумий фойдаланишдаги йўлларда синовлар 2027 йилдан бошланиши кўзда тутилган. Дастлабки синовлар логистика ва йирик тижорий транспортларда, жумладан, Тибадаги Татеяма тезюрар автомагистралида ўтказилади. Honda тизимнинг анъанавий тезкор қувватлаш тармоғига нисбатан нархи ҳақида ҳозирча маълумот бермади: унинг иқтисодий жиҳатдан қанчалик фойдали экани ҳам ҳали баҳоланиши керак.
