Уайлдер ва Фьюри ўртасидаги жанг дуранг билан якунланди. Улар яна куч синашишмоқчи

Америкалик Деонтей Уайлдер Буюк британиялик Тайсон Фьюрига қарши ўтказилган жангда бокс бўйича оғир вазнда жаҳон чемпиони унвонини ҳимоя қилди. Лос-Анжелесдаги Staples Center аренасида бўлиб ўтган жанг дуранг билан якунланди. 

Тўққизинчи раунд ўрталарида Уайлдер Фьюрини кетма-кет учта зарба бериб нокдаунга учратди. Фьюри 12-раунд бошида яна бир бор нокдаунга учради.

Жанг якунида ҳакамлардан бири Уайлдер 115:111 ҳисобида ғалаба қозонганини қайд этди. Иккинчи ҳакам Фьюрини ғолиб деб топди (114:110). Учинчи ҳакам 113:113 ҳисобида дуранг бўлди деб ҳисоблади.

Уайлдер ва Фьюри профессионал рингда бир марта ҳам мағлубиятга учрамаган. Америкалик боксчи ҳисобида 40 ғалаба (39 нокаут) ва бир дуранг бўлса, британиялик боксчи 27 ғалаба (19 нокаут) ва бир дуранг қайд этган.

Жангдан кейин берган интервьюларида ҳар икки боксчи реванш жанги ўтказиш истагида эканлигини айтди. 

"Навбатдаги жангим Фьюри билан реванш жанги бўладими, буни билмайман, аммо буни қувонч билан қарши олган бўлардим",  деди Уайлдер

"Биз албатта реванш ўтказамиз, бунга тайёрланаверинглар", деди Фьюри.