Аргентина президентининг отаси ва акаси поралар бўйича иш юзасидан сўроқ қилинади

Аргентиналик судья Клаудио Бонадио пора бериш бўйича иш юзасидан мамлакат президенти Маурисио Макрининг отаси, тадбиркор Франко Макрини сўроққа чақиртирди. Todo Noticias телеканалининг душанба куни хабар қилишича, давлат раҳбари акаси Жанфранко Макри ҳам кўрсатмалар бериш учун судга бориши керак.

Президентнинг қариндошлари собиқ президент Кристина Фернандес де Киршнер ҳукумати пайтида давлатдан йўллар қуриш учун шартномалар олган Autopistas del Sol компанияси фаолияти билан боғлиқ саволларга жавоб беришлари керак. Жорий йил май ойигача Франко ва Жанфранко Макри ушбу фирмада улушга эга бўлган.

Autopistas del Sol собиқ амалдор Клаудио Убертининг кўрсатмаларида тилга олинган, у хусусий компанияларга давлат шартномалари берилиши учун пора олишда ўз айбини тан олганидан кейин тергов билан келишувга эришган.

Поралар юзасидан иш бўйича тергов ўтган йил ноябрь ойида, режалаштириш вазири ўринбосари Роберто Барратанинг ҳайдовчиси собиқ рафиқаси полицияга эри пул тўла сумкаларни ташиётганини кўргани ҳақида айтганидан сўнг бошланди. Айблов версиясига кўра, бу пуллар қурилиш ва энергетика компанияларидан пора ҳисобланади. Ҳайдовчининг уйидаги тинтувлар давомида у ўз ҳаракатларини батафсил тасвирлаб берган дафтарлар топилди.