Венесуэлада Мадуро томонидан «ўғирлаб кетилган» собиқ нефть вазири вафот этди

Венесуэла нефть саноати собиқ вазири, шунингдек, PDVSA Венесуэла давлат нефть-газ ширкати раҳбари Нельсон Мартинес ҳибсдалиги вақтида вафот этди. Бу ҳақда Венесуэланинг БМТдаги собиқ доимий вакили Рафаэль Рамирес твиттердаги ўз саҳифасида ёзган.

Рамиреснинг таъкидлашича, Мартинес Венесуэла президенти Николас Мадуро ва унинг прокурори томонидан «ўғирлаб кетилган».

«Унга [Мартинес] ёмон муносабатда бўлишди ва барча нарсага, шу жумладан, ҳаётга бўлган ҳуқуқларини олиб қўйишди», - дея қўшимча қилиб ўтди Рамирес.

Шунингдек, унинг маълум қилишича, Мартинес «ажойиб» профессионал ва «ватанпарвар» бўлган.

PDVSA собиқ раҳбари 2017 йилда ҳибсга олинган, ўшанда Венесуэла ҳукумати нефть-газ соҳасида «тозалаш ишларини» ташкиллаштирди.

Эслатиб ўтамиз, аввалроқ Венесуэладаги қийноқларда минглаб кубаликлар иштирок этаётгани хабар берилганди.