Visual Capitalist инфографикаси Eni компаниясининг World Energy Review 2026 ҳисоботига асосланган. Унда 2025 йил 31 декабрь ҳолатидаги нефт захиралари ва компания қўллайдиган минтақавий таснифдан фойдаланилган.
Яқин Шарқда жаҳон захираларининг қарийб ярми бор
Яқин Шарқ нефт захиралари бўйича дунёда биринчи ўринда туради. Минтақадаги йирик захиралар қуйидаги мамлакатларда жамланган:
Саудия Арабистони — 267,2 миллиард баррел;
Эрон — 208,6 миллиард баррел;
Ироқ — 145 миллиард баррел;
Бирлашган Араб Амирликлари — 113 миллиард баррел.
Шунга қарамай, Яқин Шарқ қазиб олиш ҳажми бўйича иккинчи ўринда. 2025 йилда минтақада кунига қарийб 31 миллион баррел нефт қазиб олинган.
Минтақанинг энг йирик ишлаб чиқарувчиси Саудия Арабистони бўлиб, унинг кунлик кўрсаткичи 9,6 миллион баррелни ташкил этган. Ҳисоботда келтирилишича, мамлакатда ишлаётган нефт бурғилаш қурилмалари сони 2025 йилда сўнгги 20 йилдаги энг паст даражага тушган. Бу пайтда энергетика инвестициялари тобора кўпроқ табиий газ қазиб олишга йўналтирилган.
Венесуэла — мамлакатлар орасида етакчи
Марказий ва Жанубий Америка 354,8 миллиард баррел ёки жаҳон захираларининг 19,7 фоизи билан минтақалар орасида иккинчи ўринни эгаллаган.
Бу захираларнинг қарийб 86 фоизи Венесуэлага тўғри келади. Мамлакатда 303,4 миллиард баррел нефт мавжудлиги баҳоланган — бу дунёдаги энг юқори миллий кўрсаткич.
Бироқ Венесуэланинг қазиб олиш имкониятлари чекланган. Конларни ўзлаштириш ўта оғир нефт қазиб олиш зарурати, иқтисодий муаммолар ва инфратузилманинг етарлича ривожланмагани сабабли қийинлашмоқда.
Шимолий Америка захирада учинчи, қазиб олишда биринчи
Шимолий Америкада 246 миллиард баррел нефт захираси бор. Бу жаҳон кўрсаткичининг 13,6 фоизига тенг.
