Таълим сифатини назорат қилиш давлат инспекциясига янги лавозим киритилди

Президентнинг "Таълим сифатини назорат қилиш тизимини такомиллаштириш бўйича қўшимча чора-тадбирлар тўғрисида"ги қарорига мувофиқ, Вазирлар Маҳкамаси ҳузуридаги Таълим сифатини назорат қилиш давлат инспекциясига қўшимча вазифалар юклатилди, дея хабар берди Бош вазир ўринбосари Азиз Абдуҳакимов Kun.uz'га. Бу вазифалар қуйидагиларни ўз ичига олади:

·      Ўзбекистон Республикаси таълим муассасалари рейтингини тузиш ва расман эълон қилиш;

·      ўқувчиларнинг билим даражасини баҳолаш бўйича халқаро дастурлар ва тадқиқотларда Ўзбекистон Республикасининг иштирокини таъминлаш;

·      етакчи рейтинг ташкилотлари билан ҳамкорлик қилиш ва миллий олий таълим муассасаларининг дунёнинг етакчи рейтингига киришига ҳар томонлама кўмаклашиш.

Шунингдек Бош вазирнинг хабар беришича, Миллий олий таълим муассасалари фаолиятини ўрганиш ҳамда ҳар чоракда Ўзбекистон Республикаси Президенти Администрациясига ушбу муассасаларда кадрлар тайёрлаш сифатини, жумладан халқаро стандартлар ва илғор хорижий тажрибани жорий этиш орқали ошириш юзасидан таклифлар киритиб бориш учун жавобгар бўлган Давлат инспекцияси бошлиғининг биринчи ўринбосари лавозими киритилди.

"Давлат инспекцияси бошлиғининг биринчи ўринбосари Вазирлар Маҳкамаси томонидан ушбу лавозимга тайинланади ва ундан озод этилади ҳамда мақоми, тиббий ва транспорт таъминоти шароитлари бўйича вазирнинг биринчи ўринбосарига тенглаштирилади", - дейди Азиз Абдуҳакимов.

Бундан ташқари, ҳужжат билан Давлат инспекциясининг бошқарув ходимлари чекланган сони 108 нафардан иборат янгиланган ташкилий тузилмаси тасдиқланади.

Давлат инспекциясининг бошлиғига, зарур ҳолатларда, ходимларнинг ўрнатилган чекланган умумий сони ва меҳнатга ҳақ тўлаш фонди доирасида Давлат инспекцияси тузилмасига ўзгартиришлар киритиш ҳуқуқи берилди.