Босиб олишми ёки мусодара қилиш? Ҳокимият ва Миллий гвардия «Янгиобод» турбазасидаги ҳолат бўйича изоҳ берди 

Тошкентдан 120 км узоқликда, Ангрен атрофида жойлашган «Янгиобод» туристик базаси соҳиблари Тошкент вилояти ҳокими Ғуломжон Ибрагимовнинг ушбу объектни давлат фойдасига олиб қўйиш ҳақидаги  қарорига суд тартибида эътироз билдиришаётганини маълум қилишди.

Улар турбаза ҳудудини Ўзбекистон Миллий гвардияси вакиллари қуршаб олишгани ва у ерга ҳеч кимни киритишмаётгани ҳақида хабар қилишганидан сўнг мазкур воқеа шов-шувли тус олди. Бу билан мулкни мусодара қилиш ҳолатида кўзда тутилган қонунчилик ва тартиб бузилган.

2019 йил 25 январда ҳукуматнинг «давлат эҳтиёжлари учун» олиб қўйиш ҳақидаги фармойишига асосан Тошкент вилояти ҳокимининг  қарори чиқарилган. «Янгиобод» туристик базаси ҳаммуассисларидан бири Али Тўхтаевнинг сўзларига кўра, 22 январда Миллий гвардиянинг саккиз нафар вакили келиб, хўжаликни қуршаб олиш ва қўриқлаш ҳақида буйруқ борлигини айтишади.

«Эртаси куни вилоят ҳокими ўринбосари, Ангрен ҳокимлиги ва Миллий гвардия вакилларидан иборат бутун бошли делегация келди ва база берилганини эълон қилишди. Улар кўз ўнгимда барча нарсани хатлаш, ҳеч кимни киритмаслик ва чиқармаслик ҳақида буйруқ беришди», – деди Тўхтаев Kun.uz’га берган интервьюсида, «улар ноқонуний ҳаракат қилаётганини тушуниб тургани учун» бўлиб ўтаётган воқеани «хотиржам қабул қилганлигини» айтаркан.

«Улар бизнинг ишимизга тўсқинлик қилишди ва ҳалигача ҳудудимизда қолишмоқда», – деди у.

Тўхтаевнинг таъкидлашича, у турбазанинг олиб қўйилиши ҳақидаги қарорни 26 январь куни олган. Бир неча кундан сўнг ҳокимлик вакиллари юрист ҳамроҳлигида келишган ва «ҳаммасини қонуний қилиш кераклигини, шунда ҳеч ким уларнинг ишлашига халақит бермаслигини» айтишган.

Ангрен ҳокими ўринбосари Жасурбек Зайниддинов Kun.uz’га турбаза ҳали ҳам хусусий мулк эканлигини маълум қилди. «Биз ҳокимлик томонидан чеклов қўймадик, объект ҳали ҳам олдинги эгаларига тегишли. У ҳоким қарори билан танишган», – деди у.

«[Олиб қўйилиш] сабабини ошкор қилолмайман. Бу ёпиқ маълумот. Бу ҳақдаги маълумотга эга эмасман. Аммо турбаза ҳокимлик балансига ўтиши кераклиги тўғрисида Тошкент вилояти ҳокимининг қарори мавжуд. Буларнинг бари ҳукумат фармойиши асосида», – деди Зайниддинов ва турбазага ташриф буюрувчиларнинг қўйилмаслиги масаласида унга ҳеч ким мурожаат қилмаганини қўшиб қўйди.

У қонунчиликка мувофиқ, ҳокимлик олиб қўйилган мулк ўрнига бир нечта ер участкаларини таклиф этиши кераклигини тушунтирди. Сўнгра мулк эгалари давлат тўлайдиган компенсациядан келиб чиқиб ўз мулкларини баҳолатишлари керак бўлади.

Босиб олиш бўлганми?

Бу вақтда эса ижтимоий тармоқларда Миллий гвардия вакилларининг ҳаракатлари «босиб олиш» ёки хусусий мулкни «олиб қўйиш»га уриниш сифатида кенг муҳокамага сабаб бўлди.

Куч тузилмаси вакиллари Kun.uz’га ходимлари ўша ерда эканлигини тасдиқлашди, аммо унинг ҳудуди ўраб олингани ёки ташриф буюрувчилар қўйилмаётганлигини инкор қилишди.

«Бизда улар ёзишаётгандек мақсад йўқ», – деб изоҳлади Миллий гвардия вакили. – Вакилларимиз ўша ерда. Улар биринчи куни боришган ва фақатгина ҳудудни кўздан кечиришган. Ушбу босқичда бизнинг ишларга алоқамиз йўқ».

Ангрен ҳокими ўринбосарининг сўзларига кўра, Ибрагимовнинг қарорида турбаза ҳокимлик балансига берилиши кераклиги кўрсатилган. Шу билан бирга Миллий гвардия унинг ўрнида ҳарбий қисм қурилиши мумкинлигини инкор этмади.

«Этакда Оҳангарон-Ангрен туристик кластери ташкил этилади. Шунингдек, у ерда стратегик объект – сув омбори ва ГЭС бўлади. Миллий гвардия уларни қўриқлаш ишларини бажаради. Бундан ташқари, бизга чегара қўшинларига кўмак бериш вазифаси ҳам қўйилган. Тарихга назар солсангиз, 1999 йилда мазкур ҳудуд орқали террорчилар ҳужуми амалга оширилганини кўрасиз. Бу биринчи навбатда давлат хавфсизлиги манфаатларига тааллуқли», – деди исмини ошкор этишни хоҳламаган Миллий гвардия вакили.  

Унинг ҳисоблашича, турбаза эгалари шов-шувлар орқали ўзларининг музокаралардаги мавқеларини кучайтиришга ва компенсация нархини оширишга уринишмоқда.

«Миллий гвардия – миллий хавфсизлигимиз устунларидан бирининг обрўсига путур етказиш ҳолати ҳам бор. Бу шунчаки сўзлар эмас. Биз жанговар қобилиятга эга куч тузилмасимиз. Агарда Миллий гвардия шаънига номақбул сўзлар айтилса, жамоатчилик ишончи сўнади – бу давлатга қарши ҳаракат. Улар мана шуни тушунишмаяпти», – дейди суҳбатдош.

«Қонуний механизм мавжуд, судга беришсин. Аммо улар ҳаммасини бошқача изоҳлашяпти. Бу гўёки рейдерликдай. Бундай бўлиши мумкин эмас. Кузатиш мақсадида одамлар қўйилган, лекин ҳеч ким ташриф буюрувчиларга тўсқинлик қилгани йўқ. Интернетда қандайдир уйдирмаларни ёзишмоқда. Барчаси хавфсизлик мақсадида қилинмоқда», – деб қўшиб қўйди у.

Миллий гвардия турбаза унинг ходимлари учун дам олиш жойи сифатида кераклиги ҳақидаги тахминни ҳам инкор қилди.

«Ҳеч ким турбазадан дам олиш зонаси сифатида фойдаланишни мўлжаллагани йўқ. Биз дам оладиган ташкилот эмасмиз. Бир йилдан сўнг у ерда бирортаси дам оладиган бўлса, ёзиб чиқишингиз мумкин. Фожиа ясаш керак эмас, ҳеч ким у ерни тиканли сим билан ўраб олмайди, ҳеч ким артиллерия ёки ўточар қуроллар жойлаштирмоқчи эмас. Биз Мудофаа вазирлиги эмасмиз. Миллий гвардия кучлари туристик минтақа хавфсизлигини таъминлайди», – деди Kun.uz суҳбатдоши.

«Биз нолдан ташкил қилинамиз ва қандайдир объектларни оламиз. Бизни бинолар эмас, стратегик жойлашув ҳудуди қизиқтиради. Тадбиркорнинг турбазага киритган маблағлари эса тўлаб берилади. Уларнинг эътирозларини тушунса бўлади. У ерда кўп ишлар қилинган ва маблағ сарфланган», – деб қўшиб қўйди у.

Али Тўхтаевнинг айтишича, у Миллий гвардия кучларини жойлаштириш учун бошқа жой танлаш бўйича ҳукуматга муроса йўлини таклиф қилишга уринган.

«Бу биз учун шок бўлди, шу боис ўйлаб қолдим: балки муросага келса бўлар? Қурилган нарсани нега бузиш керак? Аммо бу саволимизга жавобни эшитмадик», – деди Тўхтаев. 

«Янгиобод» турбазаси эгаси Али Тўхтаев билан видеоинтервьюни бугун кўришингиз мумкин.