«Муҳим ахборотлар сирлигича қолиб кетмоқда». ​​ЎзМММ раиси давлат ва хўжалик ташкилотларига мурожаат қилди

Ўзбекистон Миллий матбуот маркази раиси​ Шавқиддин Ғаниев​ вазирлар, давлат ва хўжалик бошқаруви органлари раҳбарларига очиқ мурожаат қилиб, уларнинг айримларини хориж «тажрибасидан самарали фойдаланма​ётган»ликда айблади. 

Ғаниевнинг таъкидлашича, Европа давлатларида вазирлар ҳар кунлик ишини матбуот марказларда бошлайди: улар жамоатчиликда катта қизиқиш уйғотган воқеа-ҳодисалар, танқидий муносабат билдирилган ёки кенг муҳокама этилаётган масалалар юзасидан ўзининг муносабатини билдиради.

«Лекин негадир ҳурматли раҳбарлар, Сиз бу тажрибадан самарали фойдаланмайсизлар», — дея Шавқиддин Ғаниев сўзларини келтиради ЎзА.

​​Унинг таъкидлашича, айрим ташкилот ва вазирлик раҳбариятининг фаоллигини инобатга олмаса, бошқа раҳбарлар «рўй бераётган улкан ўзгаришлар» ҳамда «амалга оширилаётган туб буришлар ҳақида тўлақонли маълумотлар» бера олмаяпти. 

«​​​Натижада кейинги икки йил давомида мамлакатимизнинг барча жабҳасини бирдек қамраб олган ислоҳотларнинг мазмун-моҳияти ҳақида, Давлат дастурларининг бажарилиш жараёнлари ва белгиланган чора-тадбирлар, устувор вазифалар ижроси юзасидан муҳим ахборотлар сирлигича қолиб кетмоқда​», — дея таъкидлайди у очиқ мурожаатда. 

​Ғаниев одамлар, журналистлар, шу жумладан, блогерлар раҳбарлар айтмаган ахборотларни ёт, шубҳали манбалардан излабгина қолмай, топиб ҳам олаётганига эътибор қаратган.

«​Шаҳар дарвозасини ёпиш мумкин, лекин информацияни ёпиб бўлмайди. Кундан-кунга шиддат билан ўзгараётган замон узуқ-юлуқ жавоблар билан қаноатланмай қолганлиги ҳам ҳеч кимга сир эмас», — дейди у.

​Шавқиддин Ғаниев жамоатчиликда катта қизиқиш уйғотаётган воқеа-ҳодисалар, ОАВда, ижтимоий тармоқларда кенг муҳокама этилаётган масалалар юзасидан кечиктирмасдан, раҳбарлар ўз қатъий ёндашувини маълум қилиш​ига чақирган.

«Журналистларда, шу жумладан, блогерларда туғилаётган саволларга аниқ ва асосли жавобингизни қайтаришингиз керак», — дейди у.