Навоийда болаларни калтаклаб келган хусусий боғча тарбиячиси жиноий жазога тортилди. Kun.uz суд ҳужжати билан танишди
Суд ҳукмига кўра, 23 ёшли Н.Э. 2025 йил декабридан 2026 йил апрелигача қадар Навоий шаҳридаги Amin kids хусусий боғчасида 1-3 ёшли болалар гуруҳида тарбиячи бўлиб ишлаган. У ушбу гуруҳдаги 5 нафар вояга етмаган болани калтаклаб, зўрлик ишлатган ҳолда қийнаб келган. Оқибатда болалар енгил тан жароҳати олган.
Ижтимоий тармоқларда тарқалган видеода у болаларга бақиргани, силтаб тортиб, ургани ва тепганини кўриш мумкин. Ўрганишлар давомида у болаларни мунтазам равишда дўппослаб келгани маълум бўлган.
Н.Э. судда айбига қисман иқрорлик билдирган.
“7 апрел куни болаларга дидактик ўйинларни ўргатаётган вақтимда ёрдамчи тарбиячи ёнимда эди. Болалардан бири гапларимга қулоқ солмасдан бошқа болаларни тишлаб, қорнидан тепаётганини кўрдим ва қўлим билан унинг елкасидан уриб, кийимидан тортган ҳолда ўйин майдончасига улоқтириб юбордим.
Шу куни болалар телевизор томоша қилиб ўтирганида икки тарбияланувчининг қулоғидан тортиб, танбеҳ бердим. Тушлик пайтида яна бир бола инжиқлик қилавергани учун енгидан тортиб, отиб юбордим. Мен болаларни уриб, танбеҳ бераётганимда ёрдамчи тарбиячи видеога олиб турганидан хабарим бўлмаганди”, деган у ўз кўрсатмасида.
Н.Э. турмуш ўртоғи билан ўртасидаги оилавий келишмовчиликлар сабабли доим асабий ҳолатда юрганини, оилавий низолар кайфиятига таъсир кўрсатганини айтиб, суддан енгиллик сўраган.
Судда калтакланган болаларнинг ота-оналари жабрланувчи сифатида кўрсатма берган. Улардан бири боғчадан келгач ўғлини чўмилтирмоқчи бўлганида қўл, оёқ ва орқасида шилинган жароҳатлар борлигини кўрганини, бу ҳақда тарбиячидан сўраганида у “арғимчоққа урилиб кетганида жароҳат олган бўлиши мумкин”, дея жавоб берганини айтган.
Бошқа ота-оналар ҳам шунга ўхшаш кўрсатмалар беришган.
Ҳолат юзасидан психологик текширув тайинланиб, болаларнинг тарбиячи Н.Э.га нисбатан реакциясига эътибор қаратилган. Тарбиячининг сурати кўрсатилганда болаларда қўрқув, онасига интилиш каби реакциялар кузатилган. Психолог болаларда тарбиячи билан боғлиқ травматик ҳолат, психологик ҳамда жисмоний зўравонлик аломатлари мавжудлиги ҳақида хулоса берган.
Н.Э.нинг қилмиши жабрланувчи ва гувоҳларнинг кўрсатмалари, суд-тиббий экспертиза хулосалари ва бошқа далиллар билан ўз исботини топган, деб ҳисобланган.
