Эрон Трампнинг сўзлари тўқнашувлар келтириб чиқариши мумкинлигидан ташвишланмоқда

Фото: Brian Cianciо / ZUMAPRESS.com / Globallookpress

Эрон Ташқи ишлар вазирлиги вакили Баҳром Қосимий АҚШ президенти Дональд Трампнинг Голан тепаликлари Исроилга тегишли эканини тан олиш зарурлиги тўғрисидаги баёноти фонида бу «янги тўқнашувлар»га олиб келиши мумкинлигидан огоҳлантирди. Бу ҳақда РИА «Новости» хабар бермоқда.

Унинг таъкидлашича, Теҳрон Голан тепаликлари Исроилга тегишли эканини тан олиш зарурлиги ҳақидаги Трампнинг баёнотини қоралайди.

«Сионистик тузум оккупацион режим сифатида бирорта араб ва исломий ҳудудлар устидан суверенитетга эга эмас. Бу режим томонидан тажовузкорлик ҳамда оккупацияни тезда тугатиш керак», - дейилади Қосимийнинг хабарида.

Эрон Ташқи ишлар вазирлигидан қўшимча қилишларича, Теҳрон барча ўзгаришларни диққат билан кузатиб боради ва Сурия ҳукумати ҳамда бошқа давлатлар билан маслаҳатлашувлар якуни бўйича ўз сиёсий йўналишини аниқлаштиради.

Бундан олдин, Дональд Трамп АҚШ учун Исроилнинг Голан тепаликлари устидан суверенитетини тан олиш вақти келганлигини билдирганди.

#Эрон #Голан тепаликлари #Дональд Трамп