АҚШнинг Венесуэлага қарши киритган санкциялари сабабли 2 йилдан камроқ вақт ичида тахминан 40 минг венесуэлалик вафот этди. Бу ҳақда таниқли америкалик иқтисодиётчи Жеффри Сакс тадқиқотида айтилган.
“АҚШ санкциялари Венесуэла иқтисодиётини барбод қилиш ва шу йўл билан тузумни ўзгартиришга қаратилган. Бу Венесуэла халқига катта зиён келтирувчи бефойда, бешафқат, ноқонуний ва вайронкор сиёсатдир. Трамп маъмурияти томонидан 2017 йил августда киритилган катта кўламли иқтисодий санкциялар оқибатлари орасида 40 мингдан кўпроқ ўлим бор”, деб айтилган АҚШнинг иқтисодий ва сиёсий тадқиқотлар маркази эълон қилган тадқиқотда.
Илмий ишда таъкидланишича, АҚШ санкциялари озиқ-овқат ва дори-дармонлар танқислигини келтириб чиқарган ҳамда аҳоли ўртасида ўлим ва касалликлар даражаси ошишига олиб келган. Тадқиқотга кўра, 2017 йилдан ОИВ билан касалланган 80 мингга яқин одам вирусга қарши даволаниш олмаган, қанд касали ва юқори қон босимига эга 4 млн кишидан катта қисми инсулин ва юрак-томир дориларини ололмаяптилар. Вазият шундай давом этса яна ўн минглаб венесуэлаликлар ҳаётдан кўз юмиши мумкин.
