Путиндан навбатдаги қадам: айрим украиналиклар учун Россия фуқаролигини олиш соддалаштирилди

Россия президенти Владимир Путин Россия фуқаролигига соддалаштирилган тартибда қабул қилиш учун ариза бериш ҳуқуқига эга бўлган хорижий фуқароларнинг тоифалари тўғрисидаги фармонни имзолади. Ҳужжат ҳуқуқий ахборот расмий интернет-порталида эълон қилинган.

Фармонга кўра, соддалаштирилган тартиб айрим тоифадаги украиналикларга амал қилади.

Хусусан, гап Қрим ҳудудида туғилган ва доимий яшаган ҳамда ундан 2014 йил 18 мартгача чиқиб кетган шахслар ҳақида кетмоқда.

Бундан ташқари, РСФСРда таваллуд топган ва совет фуқаролигига эга бўлган Афғонистон, Ироқ ҳамда Сурия фуқаролари соддалаштирилган тартибда фуқароликни олиш учун мурожаат қилишлари мумкин.

24 апрель куни Путин Украинанинг Луганск ва Донецк областлари айрим ҳудудларида истиқомат қилувчилар томонидан Россия паспортлари олинишини осонлаштирди.

Шундан сўнг, у украинлар ва руслар учун умумий фуқаролик ҳақида гапирди.