Alibazar онлайн бозори асосчисидан тадбиркорлик сабоқлари

Тадбиркорлик – йўқотиш ва топишдан иборат соҳа. Мазкур фаолиятнинг иссиқ-совуғига чидай олган, йўлидан чекинмаган ва соҳага қандайдир янгилик олиб кира олган инсон албатта муваффақиятга эришади.

Kun.uz сайти тадбиркорлик йўналишида маълум муваффақиятларга эришиб келаётган тадбиркорлар билан учрашиб, уларнинг фаолияти ва муваффақият сирларини ўрганиш ва шу орқали ўз фаолиятини йўлга қўйиш ниятида турган ёшлар учун керакли маълумотларни етказиш мақсадида «Қадам-бақадам» лойиҳасини йўлга қўйди.

Мазкур лойиҳа  Alibazar, Europol компаниялари ва «Омадли хонадон» телелойиҳаси асосчиси Алишер Авазов билан ҳамкорликда ташкил қилинди.

Тадбиркор билан бизнес бошлаш, кичик компанияларнинг рақобат муҳитида яшаб қолиши, монополия, шунингдек, ёш тадбиркорлар учун керак бўладиган бошқа тавсиялар ҳақида суҳбатлашдик.

- Алишер ака суҳбатимиз аввалида Alibazar, Europol компаниялари, шунингдек, «Омадли хонадон» телелойиҳаси ҳақида қисқача маълумот берсангиз.

- Europol бу – қурилиш маҳсулотлари билан шуғулланувчи компания ҳисобланади. У бундан ўн беш йил аввал ташкил қилинган. Компаниянинг асосий фаолият йўналиши пол қопламаларини мижозларга етказиб бериш ҳисобланади.

Ҳозирги вақтда Europol соҳадаги тахминан ўн бешта чет эл компаниясининг Ўзбекистондаги вакили ҳисобланади.

Europol барча турдаги қурилиш материалларини чет элдан ўз савдо дўконларига олиб келади ва мижозларга етказиб беради.

Alibazar эса ҳали нисбатан ёш компания, фаолият бошлаганига энди бир ярим йил бўлди.

Мен 2015 йил малака ошириш мақсадида Америка Қўшма Штатларига бордим. У ерда малака ошириш вақтида вақтдан унумли фойдаланиб, ғоя қидиришни бошладим. АҚШ ва Ўзбекистон бозорларини ўрганган ҳолда, мамлакатимизда қурилиш моллари сотадиган онлайн-дўкон яратиш ғояси 2016 йилда келган. Шу йўналишда ишлашни ўзимга мўлжал қилиб олдим. Ва муддат келгач, айнан шу соҳада, шу йўналишда фаолият юритувчи компанияларга ишга кирдим. Мақсад улардан иш ўрганиб, таълим олиш эди.

- 2017 йилга келиб бу борада база шаклланди. Ўзбекистонда жамоа тузиб, шу йўналишда ишлашни бошладим. Мана шу йилнинг январь ойида ишимизни бошлаб юбордик.” Alibazar онлайн дўкони нега айнан қурилиш моллари сотишга мўлжалланган?” деган саволга жавоб берадиган бўлсам, бунга сабаб, ўзим қурилиш моллари савдоси билан 12 йилдан буён шуғулланаман. Бундан ташқари, бу ғоя Ўзбекистонда янгилик, инновацион ғоя бўлганлиги учун ва энг асосийси мен ўз ишимни яхши кўраман ва қурилиш моллари сотиш менга бегона эмас.

Бугунги кунда мижозлар тахминан ўн мингга яқин қурилиш маҳсулотларини бизнинг дўконимиздан харид қилишлари мумкин.

Сиз маҳсулотларимизга вебсайт, бот ва телеграм орқали буюртма беришингиз мумкин ва биз сизга уларни етказиб берамиз.

«Омадли хонадон» телелойиҳасини бизнинг эркатой компаниямиз десак бўлади. Бу ижтимоий лойиҳа ҳисобланади ва Россия телеканалларидаги «Школа ремонта» дастурига ҳам ўхшаб кетади. Биз айнан мазкур лойиҳа доирасида 2018 йилда ўнта кам таъминланган оиланинг уйини таъмирлаб бердик.

- Нима деб ўйлайсиз, бугун Ўзбекистонда бизнес бошлаш қийинми?

- Айнан шу савол билан кўплаб ёшлар ҳам бизга мурожаат қилишади. Яқинда бўй-басти келишган, олий маълумотли бир йигитнинг таксичилик қилаётганини кўриб қолдим ва у билан бироз суҳбатлашдим.

Ундан олий маълумотли, ёш бўла туриб таксичилик қилаётганини сўраганимда, Ўзбекистонда бизнес бошлаш қийин бўлиб кетгани, бугунги кунда бизнесдаги ҳамма йўналишлар эгаллаб бўлинган, дея жавоб берди.

Энг ачинарлиси, бугунги кунда кўпчилик ёшлар мана шундай фикрга ишонади.

Келинг, тарихга назар соламиз. Бундан ўн тўққиз, йигирма йил аввал дунёда тахминан уч юз ўттиз иккита миллиардер бўлган. 2010 йилда дунё миллиардерлари сони олти юз етмиштага етди, яъни рақамлар икки баробар ўсган. Шу рақам ўтган 2018 йилда икки минг икки юздан ортиб кетди.

Энди миллионерлар сонига эътиборингизни қаратсам. Асримизнинг боши 2000 йилда миллионерлар сони беш миллионта бўлган. Бу кўрсаткич 2010 йилда ўн бир ва 2018 йилда ўттиз олти миллионга етди. Ҳали тарихда миллионер ва миллиардерлар сонининг бунчалик тез даражада ўсиши кузатилмаган. Мен нега буларни айтмоқдаман? Таҳлиллар миллионер ва миллиардерликка эришган инсонларнинг етмиш фоиздан ортиғи биринчи авлод, яъни оддий оилада туғилиб ўз меҳнатлари натижасида катта маблағ жамғара олгани кўрсатмоқда. Бу ўқитувчи, шифокор ва деҳқон оиласи ҳам бўлиши мумкин.

Демак, ҳозирги пайтда миллионерлар сонини ер юзидаги умумий аҳоли сонига бўладиган бўлсак, бу кўрсаткич Ўзбекистонда тахминан икки юз мингтани ташкил қилиш керак. Бу дегани яқин бир икки йил ичида сиз-у бизни миллионер бўлиб кетишимизга катта имкониятлар мавжуд. Фақат ҳаракат қилишимиз керак.

- Алишер ака бугун Ўзбекистонда тадбиркорликнинг аксарият катта йўналишлари гигант компаниялар томонидан эгаллаб бўлинмадими?

- Аввалги саволга жавоб беришда мен миллионерлар сонини таҳлил қилдим. Уларнинг аксарияти бугун АҚШ ва Европа давлатларида яшашади. Энди айтинг-чи, Европа ва АҚШда гегемон компаниялар пайдо бўлганига юз йилдан ошмадими? Биздаги гегемонларнинг пайдо бўлганига қанча бўлди, атиги йигирма йил.

Бизнес қиламан деган киши соҳада ўрнатилган гегемонликка эътибор бериши керак эмас.

Тадбиркор Алишер Авазов суҳбат давомида шунингдек, тадбиркорлик фаолиятида дуч келиниши мумкин бўлган турли зиддиятли вазиятлар, тадбиркорликдаги илк қадамлари борасида қизиқарли фикрларини билдирди. Суҳбатни тўлиқ шаклда юқоридаги видео орқали томоша қилишингиз мумкин.

Бизга яна бир қадам яқинрок бўлинг.

Телеграм: t.me/Alisheravazov

Mover: https://bit.ly/2TcYhHU

Youtube: https://bit.ly/2MyLXiY

Instagram: http://bit.ly/2S3xhO0