Италиянинг Неапол шаҳрида ёзги Универсиада ўйинлари давом этмоқда.
8 июль куни Сан-Пауло стадионида енгил атлетика бўйича мусобақаларга старт берилди.
23та давлат спортчилари қатнашган найза улоқтириш бўйича саралаш баҳсларида иштирок этган Ўзбекистон вакили Санобар Эркинова 52,87 метр натижа кўрсатиб, мусобақанинг финал босқичига йўл олди.
Найза улоқтириш бўйича финал баҳслари 10 июль куни ўтказилади.
Маълумот учун, Қўқон давлат педагогика институти талабаси бўлган Санобар Эркинова жорий йилнинг апрель ойида Қатарда ўтказилган Осиё чемпионатида 54,75 метр натижа кўрсатиб бешинчи ўринни банд этган эди.
