Американинг Legato компанияси бир вақтнинг ўзида кўриш қобилиятини тўғрилаш ва эшитиш қурилмаси вазифасини бажаришга мўлжалланган Frames кўзойнакларини сотувга чиқарди. Кўзойнак гардишларига микрофонлар, процессор ва динамиклар ўрнатилган. Товушни қайта ишлаш тизими эса атрофдаги шовқинлар орасидан инсон нутқини ажратиб беради.
Ушбу кўзойнаклар эшитиш қобилияти енгил ва ўртача даражада пасайган инсонлар учун мўлжалланган. Микрофонлар атрофдаги товушларни доимий равишда қабул қилиб туради. Унга ўрнатилган процессор келаётган овоз сигналларини таҳлил қилади, инсон нутқини ажратади ва турли частоталарнинг кучайиш даражасини бошқаради.
Қайта ишланган товуш қулоқлар яқинида жойлашган кичик динамиклар орқали узатилади. Бунда қулоқ ичига бирор қурилма жойлаштириш талаб этилмайди. Қулоқлар очиқ қолади, шунинг учун инсон атрофдаги товушларни табиий равишда эшитишда давом этади.
Ишлаб чиқарувчи овозни йўналтирилган ҳолда узатиш технологиясини ҳам жорий этган. Бу яқин-атрофдаги одамлар кўзойнакдан чиқаётган овозни эшитишини камайтиришга ёрдам беради. Овозни қайта ишлаш жараёни бевосита кўзойнакнинг ўзида амалга оширилади. Қурилмада камера йўқ ва суҳбатлар ёзиб олинмайди.
Фойдаланувчи смартфон учун ишлаб чиқилган махсус илова ёрдамида товуш баландлигини бошқариши, турли шароитларга мослаб овозни қайта ишлаш параметрларини танлаши мумкин.
Кўзойнак гардишига оддий ёки рецепт асосида тайёрланган линзаларни ўрнатса бўлади. Гардиш турига қараб, линзаларсиз кўзойнакнинг оғирлиги 27 граммдан, линзалар ўрнатилгандан кейин эса тахминан 34 граммдан бошланади.
Кўзойнакка ўрнатилган аккумулятор 10 соатдан ортиқ ишлайди. Тўлиқ қувватланиш учун икки соатга яқин вақт керак бўлади. Ярим соатлик қувватлаш эса қўшимча икки соат фойдаланиш имконини беради.
Қурилма Bluetooth 5.3 технологиясини ҳам қўллаб-қувватлайди. Уни смартфонга улаб, телефон орқали суҳбатлашиш ва мусиқа тинглаш мумкин.
Legato уч хил гардишли — Aria, Harmony ва Symphony кўзойнакларини сотувга чиқарган. Harmony ва Symphony нархи 999 доллардан, Aria нархи эса 1099 доллардан бошланади.
