Ўзбекистон Универсиада ўйинлари тарихида теннис бўйича илк медални қўлга киритди

Италиянинг Неаполь шаҳрида Бутунжаҳон талабалари ўртасида ўтказилаётган Универсиада-2019 ўйинлари давом этмоқда. Универсиаданинг тўққизинчи кунида спортчиларимиз кетма-кет ғалабаларни қўлга киритишди. Таэквондочиларимиз ҳам универсиаданинг навбатдаги кунини ғалаба билан якунлашди.

Жисмоний тарбия ва спорт вазирлиги матбуот хизмати хабарига кўра, таэквондо бўйича баҳсларда -63 кг вазн тоифасида иштирок этган юртдошимиз Ниёз Пўлатов универсиаданинг кумуш медалини қўлга киритди.

Дастлабки жангларда Хорватия, Италия ва Туркия вакилларини мағлубиятга учрата олган спортчимиз ярим финалда хитойлик Ву Йичаодан устун келди.

Ҳал қилувчи баҳсда эронлик Сороуш Аҳмедга қарши даянга чиққан юртдошимизга бироз омад етишмади. Финал жангининг асосий вақтида 10:10 ҳисоби қайд этилган бўлса, қўшиб берилган вақтда 2:0 ҳисобида эронлик таэквондочи устунлик қилди.

Ўзбекистон делегациясига ёзги Универсиадаги бешинчи медални таэквондочи Ниёз Пўлатов тақдим этди. Бундан аввалги тўртта бронза медалини дзюдочиларимиз қўлга киритишган эди.

Шунингдек, делегацияга навбатдаги совринни теннисчи йигитлар тақдим этишди. Эркаклар ўртасида жуфтлик баҳсларининг финал ўйинида кореялик Сеочан Ҳонг ва Санҳуи Шинга қарши баҳс олиб борган юртдошларимиз Ҳумоюн Султонов ва Санжар Файзиев Универсиаданинг олтин медалини қўлга киритишди.

Кескин ва муросасиз баҳсларга бой ўтган финал ўйинининг биринчи сетида 7/6 ҳисобида вакилларимиз ғалаба қозонган бўлса, иккинчи сетда 6/4 ҳисобида кореяликлар устунлик қилишди. Тай-брейк (қўшимча гейм)да 10/5 ҳисобида зафар қучган Шуҳрат Қаюмов шогирдлари Ўзбекистоннинг Универсиада ўйинлари тарихидаги теннис бўйича илк медалини қўлга киритишди.

Теннис бўйича миллий терма жамоамиз аъзолари бўлган Санжар Файзиев Ўзбекистоннинг учинчи, Ҳумоюн Султонов бешинчи ракеткачиси ҳисобланди. Жаҳон рейтингида улар мос равишда 310- ва 380-ўринни эгаллаб туришибди.

Эслатиб ўтамиз, 12 июль куни эркаклар ўртасида ўтказилган яккалик баҳсларини ярим финал ўйинида ҳам ғалаба қозонган Ҳумоюн Султонов 13 июль кун финалда Хитой Тайпейи вакили Ценг Чун-Цинга қарши кортга тушади.