Боррел БМТнинг Ливандаги миссияси кучайтирилишини истисно этмади

Европа дипломатияси раҳбари Синварнинг ўлдирилишидан Яқин Шарқ минтақасида ўт очишни тўхтатиш учун фойдаланишга чақирди. UNIFIL тинчликпарварлик миссияси БМТ Хавфсизлик Кенгаши қарори билан кенгайтирилиши мумкин, деб ҳисоблайди Боррел.

Фото: Reuters

Фаластиннинг Ҳамас ҳаракати етакчиси Яҳё Синварнинг Ғазо секторида исроиллик ҳарбийлар томонидан ўлдирилиши Яқин Шарқ минтақасида ўт очишни тўхтатиш имкониятларини ошириши мумкин. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел 19 октябр, шанба куни Неаполда «катта еттилик» мудофаа вазирлари билан учрашувда айтиб ўтди.

«Синварнинг ўлдирилишидан сўнг янги истиқбол очилди ва биз ундан ўт очишни тўхтатишга эришиш, қолган (исроиллик) гаровга олинганларни озод қилиш ва сиёсий истиқболни топиш учун фойдаланишимиз керак», — дея унинг сўзларини келтиради Reuters.

Европа дипломатияси раҳбари UNIFIL тинчликпарварлик миссияси БМТ Хавфсизлик Кенгаши қарори билан кенгайтирилиши мумкин, деб ҳисоблайди.

Немис ҳарбий кемаси Ливан қирғоқлари яқинида дронни уриб туширди

17 октябр куни соат 7.00 лар атрофида БМТнинг UNIFIL қўшинлари таркибида Ливан қирғоқлари яқинида жойлашган Германиянинг Ludwigshafen am Rhein корвети яқинлашиб келган дронни қайтарди. Бу ҳақда dpa агентлиги Бундесвер қўмондонлиги вакили маълумотларига таяниб хабар берди. Дрон можаро иштирокчиларидан бирортасига тегишли эканлиги маълум қилинмаган, бироқ унинг қисмлари аллақачон денгизда топилган ва ҳозирда Германия ҳарбийлари томонидан текширилмоқда.

Агентлик маълумотларига кўра, учувчисиз учиш аппарати Нақураҳдан (Ливан жанубидаги кичик шаҳар, 1978 йилдан буён у ерда БМТ кучлари жойлашган) шимоли-ғарбда фойдаланилган ва қирғоқдан анча узоқда бўлган ҳолда кемага яқинлашган.