«Тоттенҳэм Ҳотспур» «Ювентус» ҳужумчиси Пауло Дибала учун катта пул тўлашга тайёр.
Daily Mail манбаси маълумотига кўра, клублар ўртасидаги музокаралар бир ой муқаддам бошланганди. «Шпорлар» президенти Дэниэл Леви жамоа бош мураббийи Маурисио Почеттинони қўллаб-қувватлаш мақсадида клубга кучли ҳужумчи олиб келмоқчи. Трансфер қиймати 80 млн фунтга (90 млн евро атрофида) баҳоланмоқда. Агар ушбу трансфер амалга ошса, Дибала лондонликлар клуби тарихидаги энг қимматбаҳо футболчига айланади. Айни вақтда бу мақом бироз аввалроқ «Лион»дан харид қилинган Танги Ндомбелега тегишли бўлиб турибди.
Бундан аввалроқ, ушбу 25 ёшли аргентиналик футболчига «Манчестер Юнайтед» ва «Пари Сен-Жермен» клублари даъвогарлик қилаётгани хабар қилинганди.
Calciomercato нашри хабарига кўра, инглизлар клуби Поль Погба ва Ромелу Лукаку трансфери билан боғлиқ вазият ойдинлашишини кутмоқда ва бу футболчилардан бири клубни тарк этиши аниқ бўлса, Дибала трансфери бўйича амалий ҳаракатлар бошламоқчи.
«ПСЖ» эса асосий ҳужумчиси Неймар клубни тарк этгудек бўлса, 25 ёшли аргентиналик футболчи хизматларига эҳтиёж сезади. Французлар клуби спорт директори Леонардо «ПСЖ» томонидан Дибалага қизиқиш мавжудлигини тасдиқлади.
Дибала ўтган мавсумда туринликлар клубининг барча турнирлар доирасидаги 42 учрашувида майдонга тушиб, жами 10 гол урган ва 6 голга узатма берган. Футболчининг «Ювентус» билан шартномаси муддати 2022 йил ёзига қадар тузилган. Туринликлар клубига у 2015 йилда «Палермо»дан 40 млн евро эвазига ўтганди. Форварднинг трансферлар бозоридаги қиймати бугунги кунда 85 млн еврога тенг.
