Қўшимча функционаллар
-
Тунги кўриниш
Нега баъзида юқори ташкилотга қилинган мурожаатга қуйи органдан жавоб келади? ИИВ расмийси изоҳ берди
ИИВ ташкилий департаменти Мурожаатлар билан ишлаш бошқармаси бошлиғи Озодбек Жўрабоевнинг таъкидлашича, ИИВ тизимида ҳудудийлик принципи мавжуд. Бу туман даражасида кўриб чиқилиши ва туман даражасида қарор қабул қилиниши шарт бўлган ҳолатларни назарда тутади.
«Кўп ҳолларда «Нега юқори ташкилотга мурожаат қилсам, тумандан жавоб қайтарилди», деган саволлар берилади. Бунга жавобан айтиш мумкинки, ҳудуддаги масъуллар ҳам мансабдор шахс ва улар белгиланган қонунчилик доирасида ҳаракатланиш ҳамда қарор қабул қилиш ваколатига эга ҳисобланади», дейди Озодбек Жўрабоев Ахборот ва оммавий коммуникациялар агентлигида ўтказилган матбуот анжуманида шу бўйича берилган саволга жавобан.
ИИВ расмийсининг қўшимча қилишича, юқори турувчи ташкилотлар ҳудуддаги масъуллар юритувидаги ҳужжатларни олиб, унга тегишли ёзма муносабат ва топшириқ бериши мумкин. Лекин ҳудудий масъуллар ўзлари бошлаган ишни охиригача тугатиб, қарор қабул қилиши шарт бўлади.
Агар мурожаатчи ҳудудда қайтарилган жавобдан қониқмасагина ундан юқори турувчи ташкилотга мурожаат қилиши мумкин.
