Жейкоб Стоукс бу ҳақда 2026 йил 27 августда эълон қилинган Superpowers and AGI ҳисоботида ёзган. Ҳужжат АҚШ ва Хитой ўртасидаги рақобатга умумий сунъий интеллект пайдо бўлиши қандай таъсир кўрсатиши мумкинлигини таҳлил қилади.
Муаллиф ҳисоботда AGI қачон ёки умуман яратилишини башорат қилмаяпти. Аксинча, таҳлил учун бундай технология пайдо бўлиши яқинлашган ёки аллақачон мавжуд бўлган шартли сценарий қабул қилинган.
AGI деганда одатда турли вазифаларда инсон даражасида ишлай оладиган умумий сунъий интеллект тушунилади. Бироқ бундай тизимларнинг қачон яратилиши ёки уларга эришиш мумкинлиги борасида ягона илмий хулоса мавжуд эмас.
Стоукс Хитой AGIʼни биринчи бўлиб яратган сценарийда АҚШ олдида кескин чораларни кўриб чиқиш масаласи пайдо бўлиши мумкинлигини ёзади. Булар қаторига киберҳужумлар ва сунъий интеллект тизимлари ишлаши учун зарур ҳисоблаш қувватлари жойлашган дата-марказларга оддий қуроллар билан зарба бериш сценарийси киритилган.
Муаллиф бундай ҳарбий ҳаракат АҚШ ва Хитой муносабатларида кескин эскалация хавфини келтириб чиқаришини ҳам қайд этади. Шу боис ҳисобот бундай чорани амалга оширишга чақириқдан кўра, AGI пайдо бўлган тақдирда сиёсатчилар дуч келиши мумкин бўлган хавфли сценарийларни олдиндан таҳлил қилишга қаратилган.
Стоукс ҳозирда CNASʼнинг Ҳинд-Тинч океани хавфсизлиги дастурида катта илмий ходим ва директор ўринбосари ҳисобланади. У аввал Жо Байден АҚШ вице-президенти бўлган даврда Оқ уйнинг миллий хавфсизлик аппаратида ишлаган.
Ҳисоботда, шунингдек, АҚШ ёки Хитойнинг AGIʼни биринчи бўлиб яратиши ўз-ўзидан геосиёсий устунликни кафолатламаслиги таъкидланган. Муаллифга кўра, технологик имкониятни иқтисодий ва сиёсий таъсирга айлантириш учун уни амалда самарали қўллай олиш ҳам талаб этилади.
