«Ходимларини иш билан таъминлаб келаётганлари ҳам давлатга ёрдам» –Икрамов пандемия шароитидаги тадбиркорларнинг 4 тоифаси ҳақида

Савдо-саноат палатаси раиси Адҳам Икрамов хайрия тадбирларида қатнашаётган тадбиркорлар қатламлари ҳақида сўз юритди.

«Карантин вазиятида бизнес вакилларининг ижтимоий масъулияти кўриняпти. Дастлаб, тадбиркорлар ўз маҳалласидаги 100дан ортиқ оилаларни ўзи таъминлаб туришини айтган тадбиркорлар ташаббус кўрсатди. Булар – биринчи турдаги тадбиркорлар.

Иккинчи қатламдаги тадбиркорлар эса солиқ, банк ва молия имтиёзлари асосида хайрия кўмакларини кўрсатаётган тадбиркорлардир. Давлат томонидан ҳам давлат биноларида ижарада ўтирадиган 4 мингга яқин тадбиркорларнинг ижара пуллари бекор қилинди.

Тадбиркорларнинг учинчи қатлами карантин даврида ҳам ўз ходимларини иш ва маош билан таъминлаб келаётганлардир. Улар қўшимча хайрия қилишга имкон топмаётган бўлсада, ходимларини иш билан таъминлаб келаётганининг ўзи ҳам катта ёрдам ҳисобланади.

Тўртинчи қатламдаги тадбиркорлар эса якка тартибда фаолият юритадиган кам сонли ишчиларга эга тадбиркорлар тоифасидир. Айни пайтда уларнинг ўзига ҳам ёрдам зарур бўлмоқда», деди Адҳам Икромов халқаро пресс клубда.

Савдо-саноат палатаси раисининг сўзларига кўра, ҳеч қайси тадбиркор ёрдам кўрсатишга мажбурланаётгани йўқ, аксинча, ёрдам кўрсатиш ташаббуси билан чиқаётганлар кўпчиликни ташкил этади.

«Тадбиркор ва ёрдамга эҳтиёжманд одамлар ўртасида ҳокимият, банк, солиқ, молия ташкилотлари туриб берса, тадбиркорларнинг ўзи маҳаллаларидаги ёрдамга муҳтож одамларни аниқлаб олади ва уларга кўмак кўрсатади», дея қўшимча қилди у.

Эслатиб ўтамиз, 20 апрель куни ўтказилган видеоселекторда давлат раҳбари томонидан «Саховат ва кўмак» умумхалқ ҳаракатини йўлга қўйиш ташаббуси илгари сурилиб, унинг доирасида тадбиркорлар имкониятидан келиб чиқиб ўз ҳудудларидаги ёрдамга муҳтож аҳолига ёрдам кўрсатиши мақсадга мувофиқлигини таъкидлаган эди. Давлат томонидан эса бундай тадбиркорларга солиқ, лизинг, кредит тўловлари, зарур ресурслар билан таъминлаш бўйича турли имтиёз ва преференциялар берилиши ҳам маълум қилинганди.