Деновда эҳтиёжмандларга пул тарқатилиб, қайтариб олинди. Тушунмовчилик қаердан келиб чиққан?

Бу ҳолатда салгина олдинроқ ўзининг оғир шароитини эсдан чиқармаган мутасаддиларнинг етти пуштини дуо қилиб турган хонадон аҳли қай ҳолатга тушади? Мана шундай ҳолат Денов туманининг «Зарафшон» маҳалласида рўй берди. Бир қарашда жуда кўнгилсиз ва хижолатли кўринадиган вазиятга масъуллар тузган рўйхатлардаги чалкашликлар ва тушунмовчиликлар сабаб бўлгани ойдинлашди.

«Саховат ва кўмак» жамғармаси орқали Қурбон ҳайити арафасида юртимиздаги эҳтиёжманд оилаларга сектор раҳбарлари раҳбарлигида бир марталик ёрдам пули тарқатилди. Сурхондарё вилояти, Денов туманидаги «Зарафшон» маҳалласида айрим кам таъминланган оилаларга маҳалла томонидан 500 минг сўмдан ёрдам пули тарқатилган. Бироқ у кўп ўтмасдан йиғиб олинган.

Воқеага аниқлик киритиш мақсадида маҳаллага борганимизда биз билан суҳбатлашган фуқаролар бу ҳақда ҳикоя қилиб беришди.

Жумладан, шу маҳаллада яшовчи Феруза Мўминова қуйидагича сўзлаб берди:

«Маҳалла томонидан ҳақиқатан ҳам пул тарқатилди. Қанча эканига эътибор ҳам бермасдан қўл қўйиб бердик. Уйга кириб қарасам, 500 минг сўм экан. Орадан икки соат ўтиб маҳалладан икки киши участка профилактика инспектори билан келди. «Пулни қайтариб беринглар, давлатни ҳақига хиёнат қилманглар», дейишди. Ишлатиб қўйганимни айтганимда «қаердан бўлса ҳам топинглар», дейишди. Ростан ҳам ҳозирги пайтда пулга муҳтож эдик...»

Яна бир фуқаро Ўлмас ая Болтаева ҳам маҳалладан икки киши келиб, дафтарга қўл қўйдириб, 500 минг сўм пул беришгани, суратларга тушириб олишгани, аммо орадан бир неча соат ўтиб қайтариб олишганини айтди.

«Маҳалла вакиллари пулни қайтариб олишга келишганида илтимос қилдим, қийналаётганимни айтдим, «йўқ, бу пуллар бошқага берилиши керак экан, биз ҳам гап этишдик», дея қайтариб олишди», дейди Ўлмас ая.

Албатта, эҳтиёжманд оилаларга давлат номидан пул тарқатилиб, унинг қайта йиғиб олишини кишида таажжуб уйғотади. Шу сабабли биз маҳалла фуқаролар йиғинида бўлиб, масъулларни саволга тутдик.

Маҳалла фуқаролар йиғини котиби Муҳаббат Қултўраева тушунмовчилик рўй берганини айтиб ўтди. Унинг сўзларига кўра, юқоридаги фуқаролар ҳақиқатан ҳам муҳтож, аммо айнан «темир дафтар»га рўйхатга олинган фуқароларга пул тарқатиш кўзда тутилган.

«Мен фақат «темир дафтар»да рўйхатда борларга пул тарқатиш бўйича топшириқни яхши тушунмаган эканман, мажлисга кечикиб боргандим. Бу дафтарда бўлмаса база қабул қилмаслигини айтишди. Бундай тушунмовчилик 9та хонадонда бўлди», деди МФЙ котиби.

Маҳалла фуқаролари йиғини раиси эҳтиёжмандлар рўйхати қандай шакллантирилганига тушунча берди.

Бир кун олдин туман жамғармамиз, «Саховат ва кўмак» фондидан пул ажратилади деб рўйхат сўраган. Рўйхат шакллантириб берилган. Бу рўйхатда юқоридаги, мурожаат қилган икки фуқаро ҳам бор эди. Ҳақиқатан ҳам ночор. Кеча сектор раҳбари чақириб пулни бериб тарқатиш кераклигини айтган. Бизда шунингдек, 75 кишилик яна бир рўйхат бор, «темир дафтар» деймиз. Бу рўйхатда ҳам кам таъминланганлар, ногиронлиги бор, чин етим каби фуқаролар бор.

Жамғарма томонидан «майли, тарқатинглар» дейилгандан сўнг, тарқатилган. Аммо кейинроқ, сектор раҳбарлари «фақат «темир дафтар»даги рўйхат бўйича тарқатасизлар» дейишади. Маҳалламиз ходимлари пул тарқатилиб бўлинганини айтишади, аммо илож йўқлиги, қайтариб олиш лозимлиги айтилгач, яна фуқаролар олдига бориб, узр сўраб, пулни қайтариб олишга мажбур бўлишади», деди «Зарафшон» МФЙ раиси Абдусалом Қурбонов.

Шунингдек, маҳалла раиси пул қайтариб олинган фуқароларга ҳам албатта ёрдам кўрсатилишини таъкидлаб ўтди. Унинг айтишича, кам таъминланган оилалар, жумладан, юқорида номи тилга олинган фуқаролар номига пластик карточкалар очиляпти ва яқин орада моддий ёрдам пули ўтказиб берилади.

Хуллас, маҳалла котиби яхши ниятда, чиндан ҳам эҳтиёжманд оилаларга пул тарқатган бўлиб чиқмоқда. Бироқ пуллар юқоридан тасдиқланган «темир дафтар» рўйхати бўйича тарқатилиши кераклиги туфайли тушунмовчилик келиб чиққан. Оқибатда у эҳтиёжмандларга ёмонлик қилгандек кўринмоқда. Улар бундан, албатта, жуда хижолатда.

Тумандаги мутасаддилар ушбу масалага ҳеч кимни норози қилмасдан чиройли ечим топишади, деган умиддамиз.

Шуҳрат Шокиржонов,
Kun.uz мухбири.