Қирғизистон президенти ҳозир истеъфога чиқишга ҳаққи йўқлигини айтди

Қирғизистон президенти Сооронбай Жээнбеков республикада парламент сайловлари ўтказилганидан кейин истеъфога чиқишини айтди. Бу ҳақда Қирғизистон президенти матбуот котиби Толгонай Стамалиева маълум қилди.

Унинг сўзларига кўра, Сооронбай Жээнбеков янги бош вазир Садир Жапаров билан учрашув ўтказган. Матбуот котибининг маълум қилишича, учрашувда "бош вазир ўз талабини – президент бугун оқшом истеъфога чиқиши керак"лигини айтган.

 "Сооронбай Жээнбеков яна бир бор ҳозир президентлик лавозимини тарк этишга ҳаққи йўқлигини, бу давлатга зарар келтирувчи олдиндан айтиб бўлмайдиган воқеаларга олиб келишини таъкидлади. У 2020 йил 9 октябрда маълум қилган позициясида туришини – парламент сайловлари ўтказилиб, мамлакатнинг янги президенти сайлови ўтказилиши эълон қилинганидан сўнг истеъфога чиқишини эслатиб ўтди", - деди Стамалиева.

 Эслатиб ўтамиз, 14 октябрь куни Қирғизистон парламенти Садир Жапаровни мамлакат бош вазири лавозимига тасдиқлаган, Жапаров Жээнбеков билан унинг истеъфоси тўғрисида мулоқот ўтказишини айтганди.