Россия ташқи ишлар вазири Сергей Лавров ва АҚШ давлат котиби Марко Рубио Филиппинда, АСЕАН (АҚШ ва Жануби-Шарқий Осиё мамлакатлари ассоциацияси) саммити доирасида Россия-Украина урушини якунлашга бағишланган музокаралар ўтказди.

Учрашув якунларига кўра, Рубио Доналд Трамп ва Владимир Путин ўртасида ўтган йил ёзида Анкорижда ўтказилган саммит Украинада тинчлик ўрнатишга ёрдам бермаганини тан олган ва шундай деган: можарони тинч йўл билан ҳал этиш учун «янги ғоялар» керак бўлади.

У олдинги музокараларда муҳокама қилинган таклифлар «Украина учун қабул қилиб бўлмас таклифлар» бўлгани, «ҳозир ҳам вазият ўзгармагани, энди Украина бу таклифларни умуман қабул қилмаслиги»ни таъкидлаган.

Рубио охирги жумла орқали айнан нимани назарда тутганига аниқлик киритмаган. Йил бошида Россия ва Украина ўртасида бўлиб ўтган расмий музокаралар чоғида томонлар Донбасс мақоми бўйича келиша олмаганди: ОАВнинг ёзишича, музокаралар давомида таклиф қилинган турли муросага келиш вариантларига қарамай, Россия Донецк областини тўлиқ ўз назоратига олмоқчи эканини билдирган, Украина эса бу вариантни қатъиян рад этган.

Лавров Рубио билан учрашувдан кейин очиқ баёнот бермади. РФ ТИВ вазирлик раҳбари «америкалик ҳамкасбига ҳарбий тўқнашув чизиғидаги ҳақиқий вазият ҳақида маълумот етказгани» ҳақидаги расмий пресс-релиз билан чекланди, шунингдек, Лавров Рубиога Европа мамлакатларининг беқарорлаштирувчи сиёсати»дан шикоят қилган.

Томонларнинг баёнотларига кўра, Рубио ва Лавров ўртасидаги музокараларда бирор ютуққа эришилмаган
Фото: EPA

Лавров ва Рубио учрашувидан бир неча соат олдин Украина президенти Володимир Зеленский Трампнинг махсус вакиллари Жаред Кушнер ва Стив Уиткофф билан телефон орқали мулоқот қилганди. Бу бўйича ҳам ҳеч қандай тафсилот ошкор этилмади: Украина президенти бу «дипломатияни фаоллаштириш ва тинчликни яқинлаштириш ҳақида муҳим суҳбат» бўлганини айтиш билан кифояланди.

Кейинроқ Зеленский суҳбат чоғида америкалик воситачилар кейинги музокараларнинг «бир неча вариантларини қисқача тақдим этгани»ни айтди. У яқин келажакда АҚШ вакиллари билан бу вариантларни муҳокама қилишга умид қилишини қайд этган.

Ўз навбатида, Россия президенти матбуот котиби Дмитрий Песков музокаралар ҳақидаги янгиликлар фонида «ортиқча оптимизмга берилмаслик»ка чақириб, «янги динамика ҳақида гапиришнинг ҳожати йўқлиги»ни таъкидлади. Шу билан бирга, у Москва Кушнер ва Уиткофф билан алоқада экани ва улар тез орада Москвага келишига умид қилаётганини айтди, бироқ аниқ муддатларни келтирмаган.