22 июль куни АҚШ ва Саудия Арабистони Ар-Риёдга АҚШ технологияларидан фойдаланган ҳолда уранни бойитиш ҳамда ядро реакторларини қуришга рухсат берувчи келишувни эълон қилган эди. Бу келишув Вашингтон Эрон олдига қўйган БМТнинг тўсатдан ўтказиладиган текширувларини назарда тутмайди.
Пайшанбага келиб АҚШ президенти Доналд Трамп Truth Social'даги саҳифасида шундай деб ёзди: «Фуқаролик ядровий келишуви (Материалларни бойитиш бўлмайди!)... фақат Эрон ва БАА (ва бошқалар) эга бўлгани каби ноҳарбий фойдаланишга тааллуқли бўлиб, тасдиқланади. Аммо, у тўлиқ — Саудия Арабистонининг жуда ҳурматли ва муваффақиятли 'Иброҳим келишувлари'га қўшилишига боғлиқ бўлади».
«Қўшма Штатлар фуқаролик (бойитилмаган) ядровий объектларига қарши эмас», деди Трамп.
Reuters’га кўра, АҚШ президенти ўзининг постида айнан нимани назарда тутгани аниқ эмас эди. Бу баёнот қуролларда ишлатиладиган юқори даражада бойитилган уранга тааллуқли ёки йўқлиги ҳам номаълум. Қурол даражасидаги уран тахминан 90 фоизгача бойитилади, ядро реакторлари учун ёқилғи эса 6 фоизгача бойитилиши кифоя.
АҚШ Конгресси келишув кучга киргунига қадар уни кўриб чиқиш учун 90 сессия кунига эга бўлади. Шунингдек, келишувнинг уранни бойитиш қисми бўйича икки йиллик техник-иқтисодий асослаш ўтказилиши кўзда тутилган.
Аввалроқ, Америка ва исроиллик сиёсатчилар подшоҳликка катта ён берилган ушбу режага қарши эканини очиқ айтиб келишаётганди. Улар Саудия фуқаролик лойиҳасидан ядро қуролини ишлаб чиқишда фойдаланиши мумкинлигидан хавотирда.
Саудиянинг Вашингтондаги элчихонаси Трампнинг ушбу постига ҳозирча изоҳ бермади. Трамп битимни Исроил билан боғлашидан олдин, Саудия Арабистони ушбу келишув энергия манбаларини диверсификация қилиш ҳамда ядровий хавфсизлик, муҳофаза ва қуролларни тарқатмаслик бўйича «энг юқори халқаро стандартлар»ни ўз ичига олишини маълум қилганди.
