Украина дронлари 24 июлга ўтар кечаси Wildberries маркетплейси омборлари бўйлаб зарба беришни давом эттирди. Компания хабарига кўра, компаниянинг Шушарах (Петербург) ва «Уткина завод» (Ленинград области) саноат зонасидаги логистика комплекслари фаолияти тўхтатилган.
Петербург губернатори Александр Беглов украин дронлари Москва шоссесидаги фуқаролик инфратузилма объектлари бўйлаб ҳужум қилгани, у ерда ҳужум оқибатларини бартараф этиш ишлари олиб борилаётгани ҳақида айтган. Лекин бу қайси объектлар эканига аниқлик киритмаган. Wildberries’нинг Шушарахдаги омбори ҳам айнан Москва шоссесида жойлашган. Бегловнинг хабарида жабрланганлар ҳақида маълумот йўқ.
Ленинград области губернатори Александр Дрозденко эса Wildberries’нинг Новосаратовка қишлоғидаги («Уткина завод» саноат зонаси шу ерда жойлашган) омборига украинлар дрони келиб урилганини тўғридан тўғри тасдиқлаган. Ҳужум оқибатида уч киши жароҳат олган.
Фото: «Бумага»
Шунингдек, Ленинград области Киров районидаги Синявино посёлкасида «Северная» паррандачилик фабрикаси омборига дрон зарбаси берилган. Бу ерда жароҳат олганлар йўқ.
Astra нашри гувоҳларнинг фото ва видеоларига таяниб, «Уткина завод» саноат зонаси ҳудудида камида учта бинода ёнғин чиққанини хабар қилган. Улардан бири – Wildberries омборидир. Унга қўшни бўлган омбор кимники экани маълум эмас. Ёниб кетган яна бир бинода эса «Строительный торговый дом „Петрович“» компаниясининг тақсимлаш маркази жойлашганди.
Бундан ташқари, Wildberries’дагилар тунда компаниянинг Симферополдаги (аннексия қилинган Қримда) саралаш марказида «хавфсизлик нуқтайи назаридан ходимлар эвакуация қилингани» ҳақида хабар қилган. Украинларнинг Exilenova+ мониторинг телеграм-канали эса ушбу омборда украинлар дрони зарбасидан кейин кучли ёнғин чиққани акс этган видеони жойлаштирган.
Шунингдек, Wildberries’нинг Твердаги омбори ҳам Украина зарбасига учрагани айтилмоқда. Телеграм-каналларда украинлар дрони ҳужумидан кейин шаҳарда ёнғин чиққани кўрсатилган бир қанча фото ва видеолар тарқалган. Маҳаллий расмийлар ва Wildberries компанияси вакиллари ҳужум ёки эвакуация тўғрисида хабар бермаган. Шу билан бирга, РФ мудофаа вазирлиги Твер областини тунда украин дронлари уриб туширилган регионлар қаторида тилга олган.
Украина ҳарбийлари сўнгги бир ҳафта ичида тўртинчи бор Wildberries маркетплейси омборларини нишонга олмоқда. Бунгача Wildberries’нинг Москва, Тамбов, Воронеж областлари, шунингдек, Краснодар ва Ставропол ўлкаларидаги жами 6 та омборига ҳужум қилганди. Бу ҳужумлар оқибатида компанияга етказилган зарар миқдори бир неча ўн миллиард рублни ташкил этади, бу омборларда маҳсулотлари ёниб кетган тадбиркорлар кўрган зарар эса 200 миллиард рублдан ошиши мумкин.
Компания тадбиркорларни муаммо қаршисида ёлғиз қолдирмасликка ва улар кўрган зарарни қоплаб беришга ваъда бермоқда.
