«Жалолиддиновга хориж клубларидан қизиқиш бор». Юрий Белоус Жасурнинг Ўзбекистонга нега қайтиб келгани, Россиядаги фаолияти ва таклифлар ҳақида

- Жасур Жалолиддинов «Спартак»ка қарши баҳсда ҳам «Тамбов»нинг қайдномасидан ўрин олмади. Унинг таркибда эмаслиги нима билан боғлиқ?

- Жалолиддинов икки ҳафтадан буён Ўзбекистонда. Уни мамлакат ёшлар жамоасига чақиришган. Шу сабабли Жасур «Спартак» билан ўйинда тамбовликлар сафида йўқ эди. Акс ҳолда бу ўйинга аниқ тушган бўларди.

- «Тамбов»да 6 ойдан буён маош тўланмаётгани ҳақида хабар қилинганди. Бу ҳолат клубда ижара асосида тўп сураётган Жасурга таъсир қилмайдими?

- Йўқ, бунинг Жасурга таъсири сезилмайди.

- Унинг маошини ҳали ҳам «Локомотив» тўлаяптими?

- «Локомотив» — нуфузли клуб, бу борада саволлар бўлиши мумкин эмас. Улар Жасурнинг трансфери мисолида яхши инвестицияга қўл уришди. «Локо» тўғри қилганига шубҳам йўқ. Кейинчалик нима бўлишини кўрамиз.

- «Тамбов» клубидаги қийинчилик сабабли Жалолиддиновнинг қишда «Локомотив»га қайтиб келиши эҳтимоли ҳам борми?

- Бу савол менга эмас, «Локомотив» клубига. Бизда бундан бошқа таклифлар ҳам мавжуд. Жасурни ўз сафида кўришни истаётган бошқа клублар ҳам бор.

- Қайси?

- Бу ҳақда гапиришга эрта.

- Бу қизиқиш хориж клублариданми ёки Россия Премьер-лигаси жамоаларими?

- Хориж клубларидан ҳам бор, Россия клубларидан ҳам. Жалолиддинов – Осиёнинг энг иқтидорли ёшларидан бири, унга талабгор жуда кўп. 

- Унинг трансферини Россияга амалга оширганингиздан афсусланмаяпсизми? Балки унда бошқа чемпионатларда, бошқача муҳитда ўйнаб кетиш имконияти кўпроқ бўлармиди?

- Яшасак – кўраверамиз. У – ёш йигит, бутун футболчилик фаолияти ҳали олдинда.

«Матч ТВ» маълумотларига кўра, Жасур Жалоллиддинов ҳозирда ўз уйи – Навоий шаҳрида бўлиб, оилавий ишлари билан банд. Ўзбекистон ёшлар жамоасининг йиғини эса бекор қилинган.