Ҳукуматнинг 2 мингга яқин қарори кучини йўқотди

Аҳамиятини йўқотган қарорларни ўз кучини йўқотган деб топиш тўғрисида Ҳукумат қарори қабул қилинди. Мазкур қарорга асосан, 1887та ҳукумат қарорининг аксарияти тўлиғича, баъзилари қисман ўз кучини йўқотди.

Ўз кучини йўқотган ҳужжатлар сифатида бугунги кунда ўз аҳамиятини йўқотган, бир марталик қоидаларни назарда тутадиган ёки муайян муддат давомида амалга оширишга мўлжалланган топшириқлардан иборат қарорлар танлаб олинган.

Бугунги кунда амалда бўлиб турган 35 мингдан ошиқ норматив-ҳуқуқий ҳужжатларни камайтириш қуйидаги мақсадларга хизмат қилади:

• керакли ҳуқуқий ахборотни излаб топиш ва фойдаланишни осонлаштириш;
• қонунчиликдаги такрорланишлар ва қарама-қаршиликларни бартараф этиш.

Шунингдек, қонунчилик ҳужжатларини қисқартириш ортиқча бюрократик тартиб-таомиллар бартараф этилишига, тадбиркорлик фаолиятига нисбатан тартибга солиш юки камайишига, қонунчилик базасини ҳаракатсиз ва амалда қўлланмаётган ҳужжатлардан тозалашга хизмат қилади.

Адлия вазирлигининг маълум қилишича, 500га яқин ҳужжатларни бекор қилишни назарда тутган 2020 йил 27 сентябрдаги 6075-сонли президент фармони ҳамда ҳукуматнинг мазкур қарори вазирлик томонидан олиб борилаётган қонунчилик ҳужжатларини тизимлаштиришнинг биринчи босқичи ҳисобланиб, иккинчи босқичда қонунчилик ҳужжатларини соҳалар кесимида бирлаштириш режа қилинган.

Эслатиб ўтамиз, бир неча кун олдин адлия вазири Русланбек Давлетов яқин кунларда 2 мингта ҳукумат ҳужжати бекор қилинишини маълум қилганди.