АҚШ Суриядаги гуруҳларга авиазарба берди. Бу – Байденнинг президентликдаги илк ҳарбий амалиёти

Америка ҳарбий-ҳаво кучлари президент Жо Байденнинг кўрсатмаси билан 26 февралга ўтар кечаси Сурия ҳудудида давомли авиазарбалар амалга оширди. Ҳужумлар нишони «Катаиб Ҳизбуллоҳ», «Катаиб Саид ал-Шуҳада» ва Эрон таъсиридаги бошқа гуруҳларнинг ўқ-дори омборлари бўлган. Ҳужум АҚШнинг аксилтеррор коалициядаги ҳамкорлари билан келишилган ҳолда ўтказилган, аммо парвозларда иттифоқчиларнинг самолётлари иштирок этмаган.

Зарбалар Суриянинг Ироқ билан чегара ҳудудидаги объектларга берилган. Пентагондагилар жами бўлиб етти объект нишонга олингани, шу жумладан, жангарилар Ироқ ҳудудида қурол-яроғ ўтказиш учун фойдаланадиган чегара назорат пункти йўқ қилингани ҳақида маълум қилган. Syrian Observatory for Human Rights ташкилоти маълумотларига кўра, ҳужумлар оқибатида 17 жангари ўлдирилган, шунингдек, ўқ-дори юкланган учта юк машинаси йўқ қилинган.

Бу зарбалар яқинда жангариларнинг Ироқда АҚШ ҳарбий хизматчилари фойдаланадиган объектларга қилинган қилинган ҳужумларига жавобан амалга оширилди. 15 феврал куни курдлар назоратидаги ҳудудда - Арбилдаги аэропортда Америка базасига ракета орқали зарба берилган, натижада бир курд хизматчи ҳалок бўлиб, америкалик ҳарбийлар, жумладан, АҚШдан келган бир неча мутахассис жабрланганди. Бир неча кун ўтиб Бағдод шимолига артиллериядан зарба берилиши оқибатида бир америкалик жароҳат олди. 22 феврал куни эса  Ироқ пойтахтидаги Америка элчихонаси ҳудуди ўққа тутилган — бу ҳолатда жабрланувчилар бўлмаган. «Катаиб Ҳизбуллоҳ» бу ҳужумларга алоқадорлигини рад этиб чиққан. 

Америклик амалдорлардан бири Reuters билан суҳбатда Байден жангариларнинг ҳаракатларига жавобан энг юмшоқ вариантни қўллаганини айтиб ўтган. У бундай зарбалар АҚШ томонидан ҳар қандай душманона ҳаракатларга жавоб бўлиши ҳақидаги сигнал вазифасини ўташи, АҚШнинг мақсади зиддиятни кескинлаштириш эмаслигини қайд этиб ўтган. «Бундай реакция тийиб турувчи омил бўлиб, Эрон, ушбу давлат томонидан қўллаб-қувватланадиган прокси-гуруҳлар ва бутун дунёдаги душманларимизга АҚШга қарши ҳар қандай ҳужум жавобсиз қолмаслигини эслатиб туради», деган Вакиллар палатасидаги хорижий ишлар бўйича қўмита аъзоси Майкл Маккол. 

Ҳозирча сўнгги воқеалар АҚШнинг Эрон билан «ядровий келишув» бўйича музокараларга тайёргарлигига нечоғлик таъсир кўрсатиши аниқ эмас. Жо Байден бир неча марта президентликка киришгач АҚШнинг Дональд Трамп маъмурияти даврида Эрон билан келишувдан чиқиши масаласи қайта кўриб чиқилишини айтганди. Расмий Теҳрон январ ойи бошида юқори даражада бойитилган уран ишлаб чиқаришни тиклаган, шу билан бирга, АҚШ томонидан музокаралар томон қадам ташланса, бу борада ён беришга тайёрлигини маълум қилганди.