Новак Жокович Рожер Федерер рекордини такрорлади

Сербиялик теннисчи Новак Жокович фаолияти давомида Профессионал теннисчилар ассоциацияси (АТР) рейтингининг энг юқори поғонасини 310 ҳафта эгаллаб, ушбу кўрсаткич бўйича швейцариялик афсонавий теннисчи Рожер Федерернинг рекордини такрорлади. 

33 ёшли Жокович АТР рейтингининг энг юқори поғонасини илк бор 2011 йил июлда эгаллаган ва 310 ҳафта давомида бундай натижани қайд қилган. 

8 март куни эса сербиялик спортчи швейцариялик ҳамкасбининг рекордини янгилаши ва бу кўрсаткич бўйича рекордчига айланиши кутилмоқда.

Ушбу кўрсаткич бўйича 3-ўринни америкалик собиқ теннисчи Пит Сампрас эгалламоқда. У ўз вақтида 286 ҳафта давомида АТР рейтингининг 1-ўрнини эгаллаган. Кейинги ўринлар чехиялик Иван Лендл (270 ҳафта) ва америкалик Жимми Коннорсга (268 ҳафта) тегишли.

Айни вақтда АТР рейтингида Жокович пешқадамлик қилмоқда. Ундан кейинги ўринларни Рафаэль Надал ва Даниил Медведев эгалламоқда.

Аввалроқ Жокович Australian Open финалида Даниил Медведевни мағлубиятга учратиб, ушбу мусобақанинг 9 карра ғолибига айланганди.