Якшанба куни Олимпия ўйинларида марказий воқеалардан бири рўй берди: эркаклар ўртасида юз метрга югуриш бўйича финал ўтказилди. Унда америкалик спортчи Ноа Лайлс 9,79 сония натижа билан ғолиб чиқди. Кумуш медал совриндори, ямайкалик Кишейн Томпсон ҳам шунга яқин натижа қайд этди, бронза эса америкалик бошқа бир чопағон Фред Керлига насиб этди (9,81).
Буюк ямайкалик Усэйн Болт фаолиятини якунлаганига қарамай, бу мусобақа одатдагидек кўплаб мухлисларнинг диққат марказида турмоқда. Бу сафар иштирокчилардан ҳеч бири у 2009 йилда ўрнатган жаҳон рекордига (9,58) яқинлаша олмади.
Бу йилги мусобақа шуниси билан ажралиб турдики, унда яққол фаворит йўқ эди: бир неча спортчи олтинга даъвогар эди ва титул тақдирини сония улушлари ҳал қилиши кутилаётганди. Шундай ҳам бўлди.
Пойга ўта қизғин кечди, айниқса финиш мухлисларни ҳаяжонда ушлаб турди. Атлетлар маррага етиб келганидан кейин ҳам ким ғолиб чиққанини билмасди: улар натижалар эълон қилинишини кутиб туришига тўғри келди. Якунда Лайлс Томпсондан сониянинг мингдан бир неча улуши билан устун келгани маълум бўлди. Америкаликнинг расмий натижаси — 9,784, ямайкаликники — 9,789.
Кимга қандай медал берилишини аниқлаш учун фотофинишга эҳтиёж сезилди, у эса Лайлснинг торси Томпсоннинг корпусидан бир неча сантиметр олдинда эканини кўрсатди.
Пойгада Токиодаги ўйинлар ғолиби, италиялик Марсел Якобс ҳам иштирок этди — у маррага 9,85 натижа билан бешинчи бўлиб етиб келди.
Мавзуга оид
Лайлс — америкалик 27 ёшли енгил атлетикачи, 200 метр масофага югуриш бўйича АҚШ рекордчиси, мазкур масофада Токио Олимпиадасининг бронза медали совриндори. Олти карра жаҳон чемпиони, жумладан 2023 йил Будапештда ўтказилган жаҳон чемпионатида олтин медални қўлга киритган.
«Бу мен истаган нарса: оғир кураш, ажойиб рақиблар, — дея Лайлснинг пойгадан кейинги сўзларини келтирган Reuters. — Барча жангга тайёр эди ва мен уларнинг орасида бир эркак бўрилар орасидаги бўри эканини исботламоқчи эдим».
Лайлс АҚШга юз метр масофага югуришда 20 йил ичидаги илк олтин медални тақдим этди. Бу масофада сўнгги олимпия чемпиони бўлган америкалик 2004 йил Афинада 9,85 натижа билан маррага биринчи бўлиб келган Жастин Гэтлин бўлганди.
Новак Жокович фаолиятида илк бор олимпия олтинини қўлга киритди
Жокович — «Катта дубулға» турнирларида 24 марта ғолиб чиққан, аммо фаолиятида илк бор олимпия чемпионига айланди.
Ғалабали ўйин уч соат давом этди. Жокович якуний матчда ғолиб бўлгач, кортга йиқилганча йиғлай бошлади, кейин эса сумкасидан Сербия байроғини чиқариб, уни мухлислар томон силкитди.
«Мен ниҳоят 37 ёшимда олимпия олтинини ютдим», — деган Жокович Eurosport телеканалига интервюсида.
«Энг асосийси, мен ўз мамлакатим учун ўйнадим. Мен Сербия учун ўйнаганимдан ғурурланаман. Мен биламанки, Карлос [Алкарас], ва Рафа [Рафаэл Надал] фахр билан Испания учун ўйнашади, Энди [Маррей] Британия учун ўйнашни ёқтиради, Роджер [Федерер] — Швейцария учун, Алекс Зверев эса Токиода Германия учун ғолиб бўлганди. Сиз бу йигитларнинг барчасининг ўз мамлакати учун ғолиб бўлгандаги реакциясини кўргансиз — бу қандайдир ўзгача ҳиссиёт», — деган олимпия чемпиони.
Жокович 2008 йилда Пекин Олимпиадасида яримфиналда бўлажак чемпион, испаниялик Рафа Надалга ютқазган, учинчи ўрин учун баҳсда америкалик Жеймс Блейкни енгган ҳолда бронза олган, 2012 йил Лондонда яримфиналда мезбон ва бўлажак чемпион Энди Маррейга ютқазган, бронза медал учун баҳсни аргентиналик Хуан Мартин дел Потрога бой берган, 2016 йил Рио-де-Жанейрода яна дел Потрога ютқазиб, олимпиадани барвақт тарк этган, Токио олимпиадасида эса яримфиналда бўлажак чемпион, германиялик Александр Зверевга мағлуб бўлган, бронза учун баҳсни испаниялик Пабло Каррено Бустега бой берган.
Парижда олтин қўлга киритган ҳолда Жокович элита клубига қўшилди, у ҳисобида «Катта дубулға»нинг барча турнирлари ғолиблиги ва олимпия чемпионлиги бор бўлган тарихдаги бешинчи теннисчига айланди. Бундай натижа билан шу вақтгача фақат Рафаэл Надал, Серена Уилямс, Андре Агасси ва Штеффи Граф фахрлана оларди.
«Бу менинг Олимпия ўйинларидаги бешинчи иштироким, — дейди Жокович. — Учтасида яримфиналда ўйнаганман, аммо қандайдир сабаб туфайли бу тўсиқдан ўта олмаганман. Мен бу сафар ҳам яримфиналда кортга чиққанимда фақат шу ҳақда ўйладим… Шунинг учун бу матчда [Алкарасга қарши финал] мен у қадар асабийлашмадим, худдики медал аллақачон меники бўлгандек. Ва мен тўлиқ куч билан ҳаракат қилишни истадим. Ўйлайманки, бу сафар финалга ўта олганим катта ёрдам берди».
Франция очиқ чемпионатида тиззасидан олган жароҳатидан кейин жарроҳлик амалиётини ўтказганига қарамай, Жокович Париждаги Олимпиадада бирорта сетни бой бермади.
Украинларда яна учта медал
Якшанба куни Парижда аёллар ўртасида баландликка сакраш бўйича мусобақа финали ўтказилди. Унда украиналик Ярослава Магучих биринчи бўлди, кумуш австралиялик Никола Олислагерсга насиб этди. Ушбу икки мамлакат вакиллари - Элеанор Паттерсон ва Ирина Герашченко бир хил уринишда бир хил натижа кўрсатгани туфайли (1.98) бронза медалга эга чиқишди.
Эътиборли томони, финалга чиққан 13 атлет орасида ўзбекистонлик Сафина Саъдуллаева ҳам бор эди ва у ҳам 1.98 метр натижани забт этди, аммо уринишлар кўплиги туфайли бронзага илина олмади.
Украиналик 22 ёшли Ярослава Магучих жиддий рақобатга учрамасдан биринчи ўринни қўлга киритди.
Финалга чиққанлардан фақат икки киши 2.00 метр баландликликни забт этди, Магучих биринчи уринишдаёқ ўтди (умуман, у финалдаги тўрт нуқтадан ҳам — 1.91, 1.95, 1.98 ва 2.00 метрдан биринчи уринишдаёқ ўтди), яшил қитъа вакили Олислагерс эса учинчи уринишда. Унинг 2.02 метрдан ўтиш учун барча уч уриниши муваффақиятсиз кечди.
Украиналик атлетнинг ҳам охирги натижаси Олислагерсники билан бир хил бўлди (2.00), у ҳам 2.02 метрдан ўтишда қийналди, лекин камроқ уриниш амалга оширгани учун олтин унга берилди.
Қайд этиш керакки, Магучих яхши формада бўлмасдан ҳам Олимпиада чемпионига айланди, ҳолбуки у бир ой олдин Париждаги Бриллиант лига босқичида 2.10 м баландликдан сакраб, болгариялик Стефка Костадиновага тегишли бўлган ва 37 йил мобайнида сақланиб турган жаҳон рекордини (2.09 м) янгилаганди. Аммо 2004 йилдан буён россиялик Елена Слесаренкога тегишли бўлган Олимпия рекордини (2.06) янгилай олмади.
Бу Ярослава Магучихнинг илк олимпия медали. Токиода у 2.00 метр натижа билан бронза олганди. Унинг бу сафарги медали Украина учун Париждаги иккинчи олтин бўлди. 3 август куни Олга Харлан бошчилиидаги украиналик қиличбоз қизлар делегация учун илк олтин медални тақдим этишганди.
4 август куни украиналик яна бир енгил атлетикачи, Михайло Кохан босқон улоқтиришда бронза медални қўлга киритди.
Нейтрал россияликларнинг кумуши
Олимпия ўйинларида аёл теннисчилар ўртасида жуфтлик баҳсларига россиялик Мирра Андреева ва Диана Шнайдер чиқишганди. Финалда улар тай-брейкда италиялик Сара Эррани ва Ясмин Паолинига 7:10 ҳисобида ютқазишди ва кумуш билан кифояланишди.
Халқаро олимпия қўмитаси Россия ва Беларусни Украинадаги уруш туфайли Париждаги ўйинларда бир жамоа бўлиб иштирок этишдан четлатган. Россиялик ёки беларуслик бўлган спортчилар саралашдан ўтадиган тақдирда бетараф иштирокчилар сифатида қатнашишига рухсат берилган, уларнинг ютуқлари медаллар бўйича умумий рейтингда ҳисобга олинмайди.
Теннисчиларнинг кумуши турнирда иштирок этаётган россияликлар учун биринчи медал бўлди.
Умумий рейтингда ниҳоят АҚШ жамоаси биринчи ўринга чиқиб олди. 4 август куни океанорти вакиллари 5 та олтин, 2 та кумуш ва 3 та бронза қўлга киритиб, жами медаллар сонини 71 тага етказди (19-26-26) ва биринчи ўринга кўтарилди. Шу куни 3 та олтин, 3 та кумуш ва 2 та бронза билан кифояланган хитойликлар (19-15-11), кумушлар сони камроқлиги туфайли иккинчи ўринга тушиб қолди.
Дастлабки ҳафта давомида кучли бешликка ҳам кира олмаган америкаликлар сўнгги кунларда шиддатни оширишди. Сўнгги кунда голф, велоспорт, сузиш ва енгил атлетикада бешта олтин олишди. Хитойликларда эса фақат учта спорт турида ғалаба – гимнастика, стол тенниси ва сузишда, сузиш бўйича эстафета баҳсларида улар яққол фаворит саналган америкаликлардан устун келишди.
