Танзания президенти лавозимини илк бор аёл киши эгаллади 

Танзания тарихида мамлакатни илк бор аёл киши бошқаради. Мамлакат президенти Жон Магуфули 61 ёшида вафот этгандан кейин унинг ўрнини вице-президент Самия Сулуҳу Ҳасан эгаллади.

19 март куни Ҳасаннинг қасамёд келтириши маросими бўлиб ўтди.

“Мен, Самия Сулуҳу Ҳасан, ҳалол бўлишга, Танзания конституциясига амал қилишга ва уни ҳимоялашга ваъда бераман”, деб айтган Ҳасан қасамёд келтириш вақтида.

17 март куни Танзания президенти Жон Магуфули 61 ёшида вафот этди. У президент лавозимини 2015 йилдан эгаллаб келган.

Расмий маълумотларга кўра, Магуфулининг ўлимига юрак хуружи сабаб бўлган. Бироқ Financial Times нашрининг маълум қилишича, Танзания президенти коронавирусга чалиниб, феврал охирларидан омма олдида кўринмай қўйган. У дастлаб Конгода, кейин эса Ҳиндистонда даволанган.  

Магуфули Африканинг коронавирусга шубҳа билан қаровчи етакчиларидан бири бўлган. У касалликни даволашнинг илмий усулларини инкор этган.