Фарғонада аёл собиқ эри ва миллий гвардия ходими бўлган қайнакаси томонидан дубинка билан калтаклангани айтилмоқда

Ижтимоий тармоқларда фарғоналик аёл ўзининг эри ва қайнакаси томонидан дубинка билан калтакланганини айтган видео тарқалди. Видеода юзида турли жароҳатлар акс этган аёл ва уни калтаклагани айтилаётган икки эркакнинг автомобилга ўтириб, воқеа жойидан кетаётган ҳолати акс этган.

Калтаклаганлардан бири миллий гвардия ходими экани айтилган.

Kun.uz манбаси берган маълумотга кўра, воқеа 2020 йил июнида содир бўлган.

Калтакланган аёл – 1987 йилда туғилган, фуқаролиги бўлмаган шахс Д.У. асли қирғизистонлик бўлиб, Фарғона шаҳрида истиқомат қилиб келади. У муқаддам ЖКнинг 168-моддаси 2-қисмининг «б» ва «в» бандлари, 168-модда 3-қисмининг «б» банди, 28, 211-моддалари билан судланган.

2015 йилдан М.Д. билан шаръий никоҳдан ўтиб яшаб келган ва 2019 йилда ажрашган, 1 нафар фарзанди бор.

Аёл шаръий никоҳда бўлиб келган эри бошқа аёлга қонуний никоҳланаётганидан хабар топгач, бунга қаршилик қилишга уринган. Шунга қарамай, эри бошқа аёлга уйланганидан сўнг, собиқ шаръий эрига ўзининг жим юриши эвазига уй олиб беришни талаб қилган, йўқса унинг турмушини бузишини айтиб пўписа қилган.

Талаби бажарилмагач, Д.У. пайт пойлаб юриб, 2020 йилнинг июнь ойида эри М.Д. ва унинг хотини М.Н. ҳамда эрининг акаси М.А. биргаликда автомобилда қариндошлариникига кетаётганда, уларнинг йўлидан чиқиб, жанжал кўтарган ва янги келин М.Н.га ташланиб, сочидан тортиб йиқитган ва қўйиб юбормаган. Ўз ихтиёри билан жанжалга чек қўймагач, орага эркаклар аралашган ва аёлни калтаклашган.

Миллий гвардия ходими экани айтилаётган М.А. (М.Д.нинг акаси) Фарғона вилояти «Динамо» жисмоний тарбия ва спорт жамиятида ишлаши аниқланган. Ушбу жамият Миллий гвардия тизимига қарашли.

Маълум бўлишича, ҳолат юзасидан ўтказилган ҳарбий прокуратура суриштируви натижасида жанжал вақтида ҳарбий хизматчи М.А. фуқаро Д.У.га қасддан соғлиғининг бузилишига олиб келмаган енгил тан жароҳати етказгани аниқланиб, унинг хатти-ҳаракатларида жиноят таркиби бўлмаган деб топилган ва интизомий жавобгарлик тўғрисида иш қўзғатиш ҳақида қарор қабул қилинган.

Шунингдек, Д.У. бугунги кунда ушбу ҳолатнинг қайта кўриб чиқилишини ва жиноий иш қўзғатилишини, шунингдек ака-укаларнинг ишдан бўшатилишини талаб қилиб келмоқда.

Эслатиб ўтамиз, кеча, 2 апрель куни Фарғона туманида миллий гвардия ҳарбий хизматчиси хизмат автомобилида пиёдани уриб юбориб, унинг ўлимига сабаб бўлганди.