«Коронавирусдан кейин ҳосил бўладиган ҳимоя ҳаммада ҳар хил муддат сақланади» - штаб аъзоси

Хусусан, саволлардан бири қуйидагича кўриниш олди:

«Ўтган йили кузда COVID билан касалланиб, соғайгандик. Яқинда қизим шамоллади, ҳид ва таъм билмаяпти. ПЗР-тест мусбат чиқди. Тузалган одамларда антитаначалар бир йилгача ҳимоя қилади дейишганди. Энди нима қиламиз?»

Севара Убайдуллаеванинг сўзларига кўра, бугунги кунда коронавирус инфекциясидан кейин ҳосил бўладиган ҳимоя иммун ҳужайралари, яъни иммуноглобулин-G барчада ҳар хил муддат сақланиши қайта-қайта таъкидланмоқда. 

«Бу инсон организмининг турли хусусиятлари — касалликни қай даражада ўтказгани, олинган даво муолажалари таъсири ҳисобидан келиб чиқиб, 3, 6, узоғи 9 ойгача ҳимоя қилмоқда. Шундан кейин бу ҳужайраларнинг титри тушиб, ҳимоя қобилияти йўқолиб кетмоқда.

Бу дегани — инсоннинг коронавирусдан ҳимояси йўқ, дегани. Қизингиз кузда касалланган экан, орадан 9 ой ўтибди, демак фарзандингизда ҳимоя ҳужайралари титри тушган, шу боис қайта касалланган.

Сизнинг тактикангиз:

• қизни алоҳидаланг;
• оилангиз аъзолари ниқоб тақиши ва ижтимоий масофа сақлашга риоя қилиши керак;
• оила аъзолари қўлларни тез-тез совун билан ювиши, томоқларни ва бурунларни тез-тез чайиб туриши керак;
• хоналарни тез-тез шамоллатиб туринг, кондиционер бор хонадан қизингизни узоқлатинг ва имкон қадар оила аъзолари ҳам кондиционерли хонада кўп бўлишмасин;
• оилавий шифокорингизни уйга чақиринг, уни қизингиздаги коронавирус аломатлари ҳақида огоҳлантиринг;
• шифокор боланинг саломатлигини тўлиқ ўрганади, даво чоралари тавсия қилади, бепул «бокс» — дори қутисини тақдим этади ва қандай дориларни қанчадан ичиш кераклигини, гигиена ва карантин қоидаларини тушунтиради, овқатланиш ва жисмоний фаоллик ҳамда нафас машқлари тўғрисида ҳам маълумот беради;
• оила аъзоларининг барчаси бемор билан контактда бўлганлар тоифасига киритилиб, 7-10 кун назоратда бўлиш талаб этилади», деди штаб аъзоси.