Деҳқонободда коврак ўсимлигини етиштириб экспорт қилаётган тадбиркорларнинг ерлари тортиб олинди

Ижтимоий тармоқларда Қашқадарё вилояти Деҳқонобод туманида коврак ўсимлигини етиштириб экспорт қилаётган тадбиркорларнинг ерлари тортиб олингани ҳақидаги мурожаати тарқалди. Деҳқонобод тумани ҳокимлиги мазкур мурожаат бўйича муносабат билдирди. Унда ёзилишича, тумандаги барча ер майдони Пиллачилик ва қоракўлчиликни ривожлантириш қўмитаси ҳисобига ўтиб кетган. Энди коврак етиштирмоқчи бўлган тадбиркорлар мазкур қўмита билан шартнома имзолаши шарт.

Қайд этилишича, Деҳқонобод туманида фаолият кўрсатадиган ва коврак ўсимлигини етиштириб экспорт қилиб келган тадбиркорлар ижтимоий тармоқлар орқали президент Шавкат Мирзиёевга мурожаат билан чиқишган. Улар ўз мурожаатида Деҳқонобод туманидан йиғилган ковракдан ҳар йили 5-6 миллион доллар экспорт қилишганини, бироқ айни кунларда уларга қарашли ерлар тортиб олинганини маълум қилишган ва президентдан кўмак сўрашган.

Деҳқонобод тумани ҳокимлигининг маълум қилишича, туманда 21 та экспортёр корхона 2020 йилда умумий ҳисобда 4 миллион 800 минг (коврак ва мева-сабзавотдан), 2021 йилнинг ўтган даврида эса 1,5 миллион доллар экспортни амалга оширган.

Қайд этилишича, Ер кодексининг 24-моддаси ва туман ҳокими қарорига кўра, тадбиркорларга ер майдонлари узоқ муддатли ижара асосида берилган. Бироқ президентнинг 2020 йил 2 сентябрдаги «Ўзбекистон Республикаси пиллачилик ва қоракўлчиликни ривожлантириш қўмитаси фаолиятини ташкил этиш тўғрисида»ги фармонига кўра, нафақат тадбиркорларнинг, балки тумандаги барча – 177 минг гектар ер майдони қўмита ихтиёрига ўтган.

«Шунингдек, 2021 йил 8 июлда президентнинг «Республикада мавжуд яйловлардан унумли фойдаланиш, ипак ва жунни қайта ишлашни қўллаб-қувватлаш бўйича қўшимча чора-тадбирлар тўғрисида»ги қарори эълон қилинган. Мазкур қарорнинг 6-бандига асосан, эндиликда жисмоний ва юридик шахслар қўмитанинг доимий эгалигидаги яйловлар ҳудудида доривор ўсимликларни, шу жумладан коврак ўсимлигини йиғиш, экиш ва етиштириш учун қўмита билан ижара шартномаси тузиб, унда белгиланган ҳудудларда режасини амалга ошириши белгилаб берилган. Тадбиркорлар мазкур ҳолатдан норози бўлган тақдирда судга мурожаат қилиши мумкин», дейилади туман ҳокимлиги билдирган муносабатда.