Жорий йилнинг 20-30 сентябрь кунлари 4-5 ёшдаги болаларни ИПВ — инактивланган полиомиелит вакцинаси билан эмлаш режалаштирилди. ССВ матбуот хизмати хабар қилишича, ушбу жараённи ўтказиш учун 1 миллион 200 минг доза инактивланган полиомиелит вакцинаси мамлакат бўйлаб эҳтиёжга асосан етказиб берилмоқда.
Полиомиелит — ўткир шол касаллиги бўлиб, асаб тизими, айниқса, орқа мияни шикастлайди. Асосан 10 ёшгача бўлган болаларга бу касалликнинг юқиш хавфи юқори ҳисобланади. Касалликнинг ягона манбайи хасталикнинг енгил ёки яширин шакли билан оғриган бемордир. Шунингдек, полиомелит касаллиги вируси шахсий гигиена қоидаларига амал қилинмаганда, оғиз орқали ифлос қўл, вирус билан зарарланган сув ва озиқ-овқат маҳсулотлари, мева ва сабзавотлар, баъзан ҳаво-томчи йўли орқали ҳам юқади.
Болаларни полиомиелитга қарши оммавий эмлашдан хавотирланишга ўрин йўқ. Бу касалликка чалиниш Ўзбекистонда охирги марта 1995 йилда қайд этилган. Мамлакатда ушбу ўткир шол касаллигига қарши фаол эпидемиологик назорат ўрнатилган. Шунинг учун ҳам бу хасталикнинг қўшни ва бошқа хорижий давлатлардан кириб келиш хавфи бартараф қилинмоқда.
Жорий йилнинг март ойида қўшни Тожикистонда ўз вақтида полиомиелитга қарши эмлаш ўтказилмагани сабаб болалар орасида полиомиелит касаллиги авж олган ва фавқулодда ҳолат эълон қилинган эди.
Шундан сўнг Санитария-эпидемиологик осойишталик ва жамоат саломатлиги хизмати томонидан Ўзбекистонда полиомиелит ва ўткир шол фалажининг (ЎШФ) фаол эпидемиологик назорат янада кучайтирилди. Ушбу касалликнинг олдини олишда ягона чора касалликка қарши эмлаш ҳисобланади.
«Юқумли касалликлар чегара нималигини билмайди. Четдан турли касалликларни қўзғатувчи вируслар кириб келиши хавфи ҳар доим мавжуд. Шунинг учун миллий эмлаш календаримиз бўйича болаларни ўз вақтида эмлаб бориш керак. Болаларнинг 2, 3, 4 ва 16 ойлигида ҳамда 7 ёшида оилавий поликлиникаларда ушбу касалликка қарши ОПВ — оғиз орқали юбориладиган полиомиелит вакцинаси билан эмлаш ўтказилади. Ҳозирда 95-99 фоиз болалар эмлаш жараёнларига қамраб олинмоқда.
20-30 сентябрь оралиғида полиомиелитга қарши эмлаш тадбирларини ўтказиш ҳам режа асосида амалга оширилмоқда», дейди Санитария-эпидемиологик осойишталик ва жамоат саломатлиги хизмати вакциналар ва имунопрофилактика бўлими бошлиғи Дилором Турсунова.
