Сенатор Қутбиддин Бурҳоновнинг маълум қилишича, Тошкент шаҳрининг Мирзо Улуғбек туманидан Тошкент вилоятининг Қибрай туманига кўчирилган фуқаролар ҳамон қийин шароитда яшаб келишмоқда. Парламент юқори палатасига қилинган мурожаатдан сўнг бошланган ишлар тўхтаб қолган.
“Бугунги кунда Тошкент вилояти Қибрай туманида Тошкент шаҳридан кўчирилган аҳоли учун ажратилган ҳудудда автомобиль йўли, газ, электр энергия, сув, канализация тармоқлари билан боғлиқ муаммоларни бартараф қилиш бўйича олиб борилаётган ишлар Сенатнинг алоҳида назоратига олинган.
Куни кеча ушбу ҳудудда олиб борилаётган ишлар билан танишиш мақсадида жойига чиқиб ўрганганимизда автомобиль йўли қурилиши сустлашганига гувоҳ бўлдик. Сабаби сўралганда эса қурилиш ишлари Автомобиль йўллари қўмитасидан етарли даражада молиялаштирилмаётгани маълум қилинди. Ушбу муаммони совуқ кунлар келгунга қадар, икки ҳафта муддатда бартараф этиш чораларини кўриб, натижаси юзасидан Сенатга ахборот берилса, мақсадга мувофиқ бўлар эди. Чунки ушбу ҳудудда автомобиль йўлини қуриш ишлари якунига етказилмаётгани сабабли газ ва ичимлик сув қувурларини тортишда, электр учун симёғочларни ўрнатишда муаммолар юзага келмоқда”, – дея сенатор Қутбиддин Бурҳоновнинг сўзларини келтирмоқда Kun.uz мухбири.
Автомобиль йўллари қўмитаси раиси Абдураҳмон Абдувалиев Тошкент шаҳридан кўчирилган фуқаролар яшаётган Дўрмон қишлоғида йўл қурилиши режа асосида кетаётганини таъкидлаб, ҳудудга сув қувурларини тортиш йўл қурилиши охирига етказилишига қараб турганини рад этди.
“Ушбу масалани ҳал қилиш молиялаштиришга бориб тақалиши тўғри. Лекин ишлар белгиланган жадвал бўйича кетяпти, нима қилиб бўлса ҳам бу масалани ҳал қилишни зиммамизга оламиз. Белгиланган муддатда йўл қуриш ишлари якунига етказилади, бу борада ҳеч қандай муаммо бўлмайди. Шу пайтгача бажарилган ишлар учун Тошкент вилоятидан ва бошқа манбаларда олишимиз керак бўлган маблағлар бор, шу бўйича молиявий қийинчиликка учраб турибмиз.
У ерга аллақачон ичимлик сув ўтказилган. Бу масала бизга қараб қолгани нотўғри. Аксинча, мазкур ҳудудга тортиб борилган ичимлик сув қувурининг охирига етмаган жойи бор. Шунинг учун ҳам бизникилар тўхтаб қолишган. Ўрганувчилар боришган пайтда молиялаштириш билан боғлиқ муаммони ҳам айтишган бўлишса керак. Ушбу масалаларнинг барчасини ҳал қилиб, бу ҳақда қўшимча ахборот тақдим этамиз”, – дейди Абдураҳмон Абдувалиев.
Сенатнинг Мудофаа ва хавфсизлик масалалари қўмитаси раиси Қутбиддин Бурҳонов Автомобиль йўллари қўмитаси раисининг сўзларига эътироз билдириб, уни ахборот бераётганда далилларга асосланиб маълумот беришга чақирди.
“Вазирлар Маҳкамаси томонидан бундан бир ярим йил илгари чиқарилган қарорга кўра пойтахтдан Қибрай тумани Дўрмон қишлоғига кўчирилганлар аллақачон электр, газ, сув ва бошқа тармоқларга улаб берилиши керак эди. Аммо бир ярим йил ичида бу ишлар умуман бажарилмаган. Умуман. Бу борада Сенатга, раис номига жуда кўпчилик мурожаат қилганидан сўнг раҳбарият топшириғи билан Қибрай туманига бориб, раҳбарларни, вазир ўринбосарларини чақириб масалани жойида муҳокама қилганимиздан кейин иш бошланди.
Автомобиль йўли қурилиши жуда яхши кетаётганди. Катта техникалар жалб этилди. Анча ишлар қилинди, лекин якунига етмасдан қурилиш ишлари тўхтаб қолган. Шунинг учун бу масала раҳбариятнинг доимий назоратида бўлиши керак ва ахборот бераётганда далилларга асосланиб маълумот бериш керак бўлади”, – дея таъкидлаган Қутбиддин Бурҳонов.
Мирзо Улуғбек тумани Ўқитувчилар кўчасида жойлашган турар жой бинолари давлат эҳтиёжлари учун олиниши сабабли у ерда яшовчи аҳоли Тошкент вилояти Қибрай тумани Дўрмон қишлоғига кўчирилгани ортидан юзага келаётган муаммолар, жумладан, бир йилдан ошиқроқ вақт давомида электр, газ, сув ва бошқа тармоқлар улаб берилмагани туфайли бирламчи шароитларсиз яшаётган юздан ортиқ хонадон аҳли Олий Мажлис Сенатига шикоят йўллаган, сенаторлар томонидан ҳолат ўрганилиб, фуқароларнинг шикоятлари асосли экани маълум бўлганди.
Қибрай туман ҳокимлигида мазкур ҳудуддаги муаммолар ечими бўйича ўтказилган йиғилишда энергетика вазири ўринбосари Шерзод Хўжаев ҳудуднинг қурилиш режаси бўлмаса, электр ҳам, газ ва сув ҳам улаб бўлмаслигини айтганди. Уй-жой коммунал хизмат кўрсатиш вазири ўринбосари Назиржон Назиров ҳам бош режасиз иш қилиб бўлмаслигини таъкидлаганди.
Сенаторлар Тошкент вилояти ҳокимлигига мазкур ҳудуд бош режасини ишлаб чиқиши учун 10 кун муҳлат берган, мутасаддилар эса ҳудуд бош режаси тасдиқланиши билан барча тармоқларни улаш ва аҳолига зарур шароитларни яратиш ишлари бошлаб юборилишини ваъда қилишган эди.
Парламент юқори палатаси томонидан ташкил этилган ишчи гуруҳ 27 сентябрь куни ушбу ҳудудда олиб борилаётган ишлар билан танишганда, 1,5-2 кмга яқин масофада ичимлик сув учун қувур ётқизилгани, уй кадастр ҳужжатлари тайёр бўлган хонадонлар табиий газга улаб берилгани, маҳалла ҳудудидан ўтувчи автойўлни қуриш ишлари бошлаб юборилгани маълум бўлган.
Сенатнинг 29 сентябрь куни бўлиб ўтган ялпи мажлисида Мирзо Улуғбек тумани Ўқитувчилар кўчасида яшовчи аҳолини ўша пайтда Тошкент шаҳар ҳокими ўринбосари сифатида Тошкент вилоятига кўчиришда бош-қош бўлган, бугунги кунда эса Тошкент вилояти ҳокими бўлиб ишлаётган Даврон Ҳидоятовга совуқ кунлар келгунича вилоятдаги мутасадди идораларни жалб қилган ҳолда Дўрмон қишлоғида бошланган ишларни якунига етказиш чораларини кўриш учун икки ой муҳлат берилганди.
