Фото: Москвада ташкил этилган сайлов участкасида катта навбат кузатилди

Ижтимоий тармоқларда тарқалган видео ҳамда фотосуратларда элчихона олдидаги навбат узоқ масофага чўзилгани, юзлаб ватандошлар сайлаш ҳуқуқидан фойдаланиш учун навбатини кутаётганини кўриш мумкин. Навбатда турганлар сони икки мингга яқин экани айтилмоқда.

Телеграмдаги “Нигоҳ” канали москвадаги ватандошларимиз Ўзбекистоннинг дипломатик ваколатхонаси билан биргаликда сайловларда иштирок этиб чиққан фуқароларга, шунингдек, жамоат тартибини сақлаш учун  жалб этилган Россия Федерацияси ҳуқуқ-тартибот идоралари ходимларига иссиқ ичимлик ва озиқ-овқат тарқатишгани акс этган суратларни эълон қилди.

Сайлов жараёнидаги бундай фаоллик Россия оммавий ахборот воситаларининг ҳам эътиборини тортган. Воқеа жойидан репортаж тайёрлаган “МИР 24” телеканали мухбири эрталабдан овоз беришга жамланган одамларнинг кўплигидан ҳайратга тушганини яширмайди.

Эслатиб ўтамиз, Россияда вақтинча меҳнат қилаётган ёки ўқиётган ўзбекистонликлар Санкт-Петербург, Қозон, Владивосток, Екатеренбург, Ростов, Новосибирск ва Москва шаҳарларида ташкил этилган сайлов участкаларида овоз беришлари мумкин.

Ўзбекистондан ташқарида 37 та хорижий давлатда 54 та сайлов участкаси тузилган бўлиб, 299 780 киши сайловчилар рўйхатига киритилган.

14–20 октябрь кунлари 120 524 нафар сайловчи Сайлов кодексининг 57-моддасига асосан чет давлатлардаги дипломатик ва бошқа ваколатхоналар ҳузурида тузилган сайлов участкаларида муддатидан олдин овоз беришган.

Президент сайлови 24 октябрь куни маҳаллий вақт билан 8:00 да бошланиб, 20:00 гача давом этади. Ўзбекистон президентлиги учун «Миллий тикланиш»дан партия етакчиси Алишер Қодиров, ЎзЛиДеПдан амалдаги президент Шавкат Мирзиёев, «Адолат» СДПдан партия раҳбари Баҳром Абдуҳалимов, Экопартиядан партия раиси Нарзулло Обломуродов ва ХДПдан Олий Мажлис қонунчилик палатаси депутати Мақсуда Ворисова кураш олиб боришмоқда.

Агар номзодлардан бирортаси 50 фоиздан кўпроқ овоз йиға олмаса, сайловларнинг 2-босқичи ўтказилиши кўзда тутилган. Унда 1-босқичда энг кўп овоз тўплаган икки номзод курашни давом эттиради.

Ўзбекистонда президент сайлови ҳар 5 йилда ўтказилади. 2016 йилда ўтказилган президент сайловида Шавкат Мирзиёев 88 фоиздан кўпроқ овоз билан ғалаба қозонганди.