13:27 / 23.10.2021
3605
420 мингдан зиёд сайловчи муддатдан аввал овоз бергани маълум қилинди
Фото: Kun.uz

14–20 октябрь кунлари 421 618 нафар сайловчи Ўзбекистон президенти сайловида муддатидан олдин овоз берган, деб хабар бермоқда Марказий сайлов комиссияси ахборот хизмати.

Сайлов кодексининг 57-моддасига кўра, сайлов куни ўз яшаш жойида бўлиш имкониятига эга бўлмаган сайловчи муддатидан олдин овоз бериш ҳуқуқига эга бўлади. Шунга асосан сайлов куни ўз яшаш жойида бўлиш имкониятига эга бўлмаган сайловчилар 14–20 октябрь кунлари давомида муддатидан олдин овоз бериш ҳуқуқидан фойдаланишди.

Муддатидан олдин овоз берган 421 618 нафар сайловчидан 301 094 нафари Ўзбекистондаги сайлов участкаларида, 120 524 нафари эса чет давлатлардаги дипломатик ва бошқа ваколатхоналар ҳузурида тузилган сайлов участкаларида овоз беришган.

Ички ишлар вазирлиги ахборот хизматининг маълум қилишича, муддатидан олдин овоз бериш жараёни Сайлов кодекси ва Марказий сайлов комиссиясининг қарорларига қатъий таянган ҳолда амалга оширилган, сайлов жараёнида жамоат хавфсизлиги, муддатидан олдин овоз берган фуқароларнинг осойишталиги тўлиқ таъминланган. Муддатидан олдин овоз бериш Сайлов кодексида белгиланганидек сайловга уч кун қолганда якунланган.

2021 йил 23 октябр – Ўзбекистон президенти сайлови доирасида “сукунат куни” ҳисобланади. Яъни шу санада ва сайлов куни сайлов ташвиқоти олиб бориш тақиқланади.

Президент сайлови 2021 йил 24 октябрга белгиланган. Сайловда «Миллий тикланиш»дан партия етакчиси Алишер Қодиров, ЎзЛиДеПдан амалдаги президент Шавкат Мирзиёев, «Адолат» СДПдан партия раҳбари Баҳром Абдуҳалимов, Экопартиядан партия раиси Нарзулло Обломуродов ва ХДПдан Олий Мажлис қонунчилик палатаси депутати Мақсуда Ворисова Ўзбекистон президентлиги учун кураш олиб боришади.

МСК маълумотларига кўра, Ўзбекистондаги сайловчилар сони қарийб 21,2 миллион кишини ташкил қилади

Мавзу
Сайлов-2021
Сайлов қонунчилигига киритилган ўзгартишларга кўра сайловлар октябр ойи учинчи ўн кунлигининг биринчи якшанбасида ўтказилиши белгиланди. 2021 йилги президентлик сайлови 24 октябрга тўғри келмоқда.
Барчаси
Top