Магдалена Андерссон беш кун ичида иккинчи марта Швеция бош вазири этиб сайланди

Андерссон 24 ноябрь куни Швеция тарихидаги илк аёл бош вазир бўлган, бироқ лавозимга тайинланганидан бир неча соат ўтгач, истеъфога чиққанди.

Фото: ТАСС

Швеция Социал-демократик ишчи партияси раҳбари Магдалена Андерссон парламент томонидан қироллик бош вазири этиб тасдиқланди. У бир ҳафтадан камроқ вақт ичида иккинчи марта ушбу лавозимга сайланди.

“Парламент аъзоларининг ярмидан озроғи қарши овоз бергани учун Магдалена Андерссон бош вазир этиб сайланди”, — деди спикер Андреас Норлен.

Андерссон 24 ноябрь куни Швеция тарихидаги илк аёл бош вазир бўлганди. Бироқ у янги лавозимда узоқ турмади: тайинланганидан бир неча соат ўтгач, истеъфога чиқди.

Швеция радиосининг хабар беришича, у Яшиллар партиясининг ҳукуматдан чиқиш тўғрисидаги қарори билан боғлиқ ҳолда Вазирлар Маҳкамасида бўлиниш юз бергани туфайли етти соатдан кейин ўз лавозимини тарк этди.

54 ёшли Андерссон 2014 йилда Швеция молия вазири бўлганди. Унгача бу лавозимда аёл киши фаолият олиб бормаган.