Вучич Сербиядаги президентлик сайловларида ғалаба қозонганини маълум қилди

Александр Вучич Сербиядаги президентлик сайловларида ғалаба қозонганини маълум қилди. Сербия прогрессив партияси штабида ўтказилган матбуот анжуманида у биринчи турда 60 фоизга яқин овоз тўплаганини айтди.

Фото: Reuters

«Мен Сербияда ҳеч ким қила олмаган ишни қилишга муваффақ бўлдим. Мен биринчи турда икки марта ғалаба қозонган ягона одамман», - дея сиёсатчидан иқтибос келтирган ТАСС.

Унинг аниқлик киритишича, 2 миллион 245 мингга яқин овоз олган. Вучичнинг сўзларига кўра, гап сайлов участкаларининг 85 фоизидан олинган маълумотлар ҳақида кетмоқда.

3 апрель куни Сербияда президентлик сайловлари, парламентга муддатидан олдин сайловлар ва маҳаллий ўзини ўзи бошқариш органларига, жумладан Белград бўйича сайловлар бўлиб ўтди. 6,5 миллиондан ортиқ фуқаро сайловда иштирок этиш ҳуқуқига эга бўлди.

Бундан олдин Сербия президенти Александр Вучич мамлакат Украинадаги вазият туфайли шошилинч равишда озиқ-овқат маҳсулотлари ва нефть маҳсулотлари сотиб олаётганини маълум қилганди.