Европада Kinder шоколадлари салмонеллёз касаллиги сабаб сотувдан олинмоқда. Ўзбекистонда-чи?

Европанинг турли мамлакатларидаги Kinder маҳсулотлари салмонеллёз касаллигига чалиниш ҳолатлари борлиги сабаб дўкон пештахталаридан олиб қўйилаётгани хабар қилинди. Kun.uz Ўзбекистонда бундай вазият мавжуд ёки йўқлиги ҳақида қизиқди.

Машҳур шоколадли тухумлар ҳамда Schoko-Bons конфетлари пештахталардан олинмоқда.

Ҳозирда Европада Kinder маҳсулотлари билан боғлиқ деб тахмин қилинган 100дан ортиқ салмонеллёз касаллигига чалиниш ҳолатлари қайд этилган.

Аксарият касалланиш ҳолатлари ўн ёшгача бўлган болаларда кузатилган.

Ferrero компанияси Франция, Белгия, Буюк Британия, Германия, Швеция ва Нидерландиядаги дўконларда сотилаётган Kinder маҳсулотларини қайтариб олишини маълум қилган.

Kun.uz Ўзбекистонда Kinder шоколадлари билан боғлиқ салмонеллёз касаллигига чалиниш ҳолатлари кузатилгани ёки йўқлигини аниқлаш учун Санитария-эпидемиологик осойишталик ва жамоат саломатлиги хизмати матбуот котиби Мафтуна Саидова билан боғланди.

Мафтуна Саидованинг қайд этишича, Ўзбекистонда Kinder шоколадлари билан боғлиқ салмонеллёз касаллиги ҳолатлари бўйича маълумот йўқ. Касаллик аниқланиши учун лабораторияда маҳсулотлар текширилиши керак, текширув олиб борилиши учун эса мурожаатлар келиб тушмаган.

Салмонеллёз – ичак трактига таъсир қилувчи кенг тарқалган бактериал касаллик. Бу бактериялар одамлар ва ҳайвонларнинг ичакларида яшайди. Кўпинча ифлосланган сув ва озиқ-овқат орқали юқади.