Галина Хатчинснинг эри адвокат орқали даъво аризасини қайтариб олганини айтди. У суратга олиш ишларини давом эттиришга қарор қилинган «Rust» вестернининг продюсери бўлади.
Ҳолливуд актёри Алек Болдуин «Rust» («Занглаган») фильмини суратга олиш чоғида ҳалок бўлган оператор Галина Хатчинснинг оиласи билан даъвони ҳал қилиш бўйича келишувга эришди. Бу ҳақда у Instagram'да маълум қилди.
Галина Хатчинснинг эри, ўз навбатида, ўз адвокати орқали даъвони қайтариб олганини маълум қилди. Бироқ, суд ҳали томонлар эришган келишувни тасдиқлаши керак. «Биз ҳаммамиз Галинанинг ўлимини даҳшатли бахтсиз ҳодиса деб ҳисоблаймиз», деди Мэтью Хатчинс.
У фильмни ишлаб чиқарувчи Алек Болдуин ва Rust Movie Productions LLC компаниясини айблашдан манфаатдор эмаслигини таъкидлади. Бунинг ўрнига хотинимнинг сўнгги ишига ҳурмат кўрсатишни хоҳлайман, деди Хатчинс. Суратга олиш давом этади. Галина Хатчинснинг эри фильм продюсери бўлади.
2021 йил 21 октябр куни Санта-Фе шаҳри яқинидаги ранчода «Rust» вестернини суратга олиш пайтида бахтсиз ҳодиса юз берди. Болдуин фильмга продюсерлик қилган ва бош ролни ижро этган. Болдуин жиноятчи сифатида тўппончадан бўш ўқлар узиши керак бўлган саҳнани суратга олиш пайтида тасодифан операторни реквизит қуроли билан отиб қўйган. Режиссёр ёрдамчиси актёрга қурол ўқланмаганлигини маълум қилган. Тергов жараёнида у револьверни охиригача текширмаганини тан олди, аммо қурол хавфсиз эканлигини айтган.
Асли келиб чиқиши украиналик бўлган оператор Галина Хатчинс вертолётда шифохонага етказилди ва олган жароҳатлари туфайли вафот этди. Фильмнинг 48 ёшли режиссёри Жоэл Соуза ҳам ўқдан жабр кўрди. У оғир жароҳат олди.
Марҳум операторнинг оиласи Болдуин ва вестерннинг бошқа продюсерларини судга берди. Галина Хатчинснинг қариндошлари бепарволик туфайли юз берган ўлим учун «катта» товон талаб қилишди. Ўз навбатида, Нью-Мексико меҳнат ва техника хавфсизлиги бюроси (OHSB) фильмни ишлаб чиқарган Movie Productions LLCга максимал мумкин бўлган 136 793 доллар (126 312 евро) жарима тайинлади.
