Бугун, 20 октябр куни “Ҳудудий электр тармоқлари” АЖ ҳамда Осиё тараққиёт банки ҳамкорлигида Ислом Каримов номидаги Тошкент давлат техника университетининг Электр энергетикаси факультети қошида ташкил этилган ўқув марказининг фойдаланишга топширилишига бағишланган маросим бўлиб ўтди.
Тадбирда таъкидланганидек, янги ўқув маркази электр тармоқларини лойиҳалаштиришга мўлжалланган замонавий IT-хонаси, “ASKUE” фанидан лаборатория машғулотлари учун замонавий лаборатория хонаси ва “Электр таъминоти” ўқув полигонидан ташкил топган.
Ўқув маркази доирасида ташкил этилган ўқув хоналари бугунги кунда ишлаб чиқаришда амалда қўлланаётган замонавий дастурлар техник қурилмалар билан бойитилган бўлиб, буларнинг барчаси энергетика соҳаси учун малакали ва сифатли кадрлар тайёрлашга асос бўлиб хизмат қилади.
Ўқув марказини ташкил этишдан мақсад – талабаларнинг мутахассислик фанлари бўйича олган назарий билимларини амалий жиҳатдан мустаҳкамлаш, соҳада қўлланилаётган қурилмаларнинг ишлаш принциплари, уларнинг турлари бўйича амалий тасаввурга эга бўлиш имкониятини бериш ҳамда Ўзбекистон электр тармоқларини замонавий DigSilent дастури ёрдамида рақамли моделининг яратилиши муносабати билан талабаларнинг мазкур дастур билан ишлаш кўникмасини шакллантириш, электр энергетика тизимларини лойиҳалаш билан боғлиқ лойиҳаларга профессор-ўқитувчилар ва иқтидорли талабаларни жалб этиш ҳамда электр таъминоти тизимида электр энергиясининг ҳисоби ва назоратининг автоматлаштирилган тизимлари, жумладан, маиший истеъмолчилар ҳамда саноат корхоналарида электр энергия истеъмоли ҳисоби ва назорати тизимларини ташкил этиш жараёнлари билан таништириш ва мазкур тизимларни қуриш кўникмасини шакллантиришдан иборат.
Мазкур ўқув маркази “Ҳудудий электр тармоқлари” АЖ ҳамда Осиё тараққиёт банки ҳамкорлигида фойдаланишга топширилган бўлиб, мазкур лойиҳалар 2021 йилда “Ҳудудий электр тармоқлари” АЖ билан Тошкент давлат техника университети ҳамкорлигида ўтказилган конференция доирасида имзоланган ҳамкорлик тўғрисидаги Меморандум ҳамда 2021-2026 йилларда “Электр таъминоти соҳаси учун малакали мутахассислар тайёрлашнинг йўл харитаси” ижроси доирасида амалга оширилди.
Ўқув маркази фаолиятининг йўлга қўйилиши қуйидагиларга имкон яратади:
- ишлаб чиқариш ва олий таълим муассасаси ҳамкорлигини ривожлантириш;
- сифатли кадрлар тайёрлаш асосида электр энергетика тизимининг рақамли модели базасини мустаҳкамлашда иқтидорли талабаларни жалб этиш;
- энергетика соҳасида амалга оширилаётган лойиҳаларда олий таълим муассасаси профессор-ўқитувчилари салоҳиятидан фойдаланиш ҳамда мазкур лойиҳаларнинг илмий асосларини яратиш;
- электр энергия истеъмоли ҳисоби ва назоратининг автоматлаштирилган тизимларини қуришнинг ўзига хос хусусиятлари, уларни қуриш кетма-кетликлари, техник ҳамда дастурий таъминоти билан таништириш;
- талабаларда саноат корхоналари ва маиший истеъмолчиларда электр энергия истеъмоли ҳисоби ва назоратини ҳисобга олишнинг автоматлаштирилган тизимларининг ташкил этиш кўникмаларини шакллантириш;
- талабаларнинг соҳага доир билимларни амалий жиҳатдан мустаҳкамлашга имкон яратиш ҳамда электр тармоқлари қурилмаларини монтаж қилиш, созлаш ва ишлатиш бўйича билим ва кўникмасини шакллантириш;
- қурилмалар билан ишлашда ҳавфсизлик қоидаларига риоя қилиш кўникмаларини шакллантириш ҳамда паст кучланишли истеъмолчилар электр таъминоти тизимини лойиҳалаштиришнинг асосий хусусиятларини тадқиқ этиш.
Тадбир давомида “Электр таъминоти” ўқув полигонида Олмазор тумани электр таъминоти корхонаси ходимлари томонидан кўргазмали тактик машғулотлар ўтказилди.
