Apple корпорацияси Nvidia’ни ортда қолдириб, дунёдаги энг қиммат компания мақомини қайтариб олди, деб хабар берди Bloomberg.
30 октябрь куни Apple қимматли қоғозлари 1,2 фоизга арзонлашди ва савдолар ёпилишида унинг капиталлашуви 5,03 триллион долларни ташкил этди. Nvidia акциялари бундан ҳам кўпроқ — 4,2 фоизга тушиб кетди ва компания 4,93 триллион долларга баҳоланди. Бунгача Apple июль ойи охирида Nvidia’ни қисқа муддатга ортда қолдирган эди.
Bloomberg маълумотларига кўра, инвесторлар сунъий интеллект харажатлари билан боғлиқ хавотирлар туфайли iPhone ишлаб чиқарувчисини хавфсизроқ актив сифатида кўришмоқда. Акциялар нархининг пасайиши Intel ва Amazon’нинг заиф ҳисоботларидан кейин кузатилди. Бу натижалар сунъий интеллектга қилинаётган харажатларнинг истиқболлари ҳақидаги саволларни яна бир бор юзага чиқарди. Bloomberg‘нинг таъкидлашича, Apple бундай сармоялардан асосан воз кечган.
Агентликнинг қайд этишича, Alphabet ва Amazon’нинг эркин пул оқими сунъий интеллект харажатлари туфайли манфий кўрсаткичга ўтган. Компаниялар қарз бозоридан тобора кўпроқ маблағ жалб қилмоқда, ўсиб бораётган фоиз ставкалари эса кредитларни қимматлаштирмоқда.
Nasdaq 100 индекси октябрь ойида 6,7 фоиз йўқотди. Бу унинг учун 2025 йил март ойидан бери энг ёмон ой бўлди. Сунъий интеллект учун ҳисоблаш қувватларини сотувчи CoreWeave ва Nebius Group акциялари бир ой ичида 30 фоиздан кўпроққа арзонлашди. Intel октябрь ойида 45 фоиздан ортиқ қийматини йўқотди.
Технологиялар бозоридаги инвесторларнинг хавотири сунъий интеллект инфратузилмасига йўналтирилган улкан инвестиция ва харажатлар ҳозирча корпорациялар даромадларининг ўсишига сезиларли таъсир кўрсатмаётгани билан боғлиқ.
